Iha reuniaun ne'e, PTR Deolindo dos Santos informa ba Primeiru Ministru katak, andamentu servisu sira ne’ebé durante la'o iha tribunál komesa hatudu progresu diak, tanba, ligadu ba kazu sira hahú la'o normál no iha nia diminuisaun.
"Ha’u hato'o ba Primeiru Ministru maka servisu kona-ba prosesu nian, katak, ami iha andamentu ne'ebé normál ona, ho mudansa foun ne'ebé akontese iha tempu hirak liu ba", Prezidente Tribunál Rekursu (PTR), Deolindo dos Santos informa ba jornalista sira, hafoin enkontru iha Palásiu Governu, kuarta (04/11).
Nia dehan, mudansa ida ne'e hatudu daudaun ona nia rezultadu, tanba prosesu ne'e komesa hatudu ona diminuisaun, ba prosesu akumula dadus iha diminuisaun ne'ebé signifikativu ona.
"Entaun, hatudu katak rezultadu di'ak. Ida ne'e haree ba prosesu ne'ebé akumula dadus iha TR mós komesa menus ona, iha de'it 18 prosesu", Deolindo informa.
Nia hatutan, iha Tribunál Dili, uluk kazu kríme ne'ebé iha prosesu, kuaze 2000, agora iha 1700-resin, iha Tribunál Suai iha 1000-resin, agora iha 805 ba prosesu kríme.
Iha Baukau, kazu ne'ebé prosesu, uluk iha 1000-resin, maibé iha ona 400-resin, tribunál Oekusi, iha 500 resin, agora tún ona ba 400-resin, iha Díli, prosesu sivil hamutuk 1.160-resin, agora tuun ona ba 1.150.
"Para alende ne'e mós ami hato'o ba Primeiru Ministru katak, servisu jestaun nian ami la'o komesa di'ak", nia tenik.