Arguidu na'in rua mak, Diretór Jerál Kompaña Telekomunikasaun Telemor ho inisiál TVB no Diretór Konpaña Elite Computer ho inisiál DP ne’ebé Polísia Nasionál Timor-Leste liu hosi Servisu Investigasaun Kriminal (SIK) detein arguidu TVB iha ninia servisu fatin Timor Plaza CBD 4 andar tolu no arguidu DP detein iha ninia servisu fatin kolmera, iha loron 23 fulan Novembru tinan 2020 no kumpre ona detensaun oras 72.
Halo Julgamentu, tanba deskonfia arguidu sira halo korelasaun servisu ba malu hodi fasilita utiliza internet ilegál ne’ebé uza satelite Indonézia nian ho kapasidade 600MBS hodi fasilita ba liña ministériu sira inklui Komandu PNTL.
Kazu refere, Servisu Investigasaun Kriminál deteta hahú kedas hosi tinan 2012 mai to'o tinan 2018, tanba fó prezuiju ba Estadu Timor-Leste lakon osan barak.
Ministériu Públiku (MP) akuza arguidu sira ho krimi burla imformatika ne’ebé previstu no punidu iha artigu 268 no krimi fraude fiskál ne'ebé previstu iha artigu 314 kódigu penal Timor Leste.
Tuir observasaun julgamentu primeiru interrogatóriu ne’e la’o hahú tuku 10:30 to’o tuku 2:00 hafoin intervalu no iha tuku 3:30 kontinua fali julgamentu no to’o iha tuku 9:00 seidauk rona desizaun ruma.
Nune’e Tribunál adia fila-fali prosesu ne’e ba loron aban iha tuku 3:00 lokra’ik hodi kontinua ba prosesu sumáriu ba desizaun primeriu interrogatóriu.
“Desizaun adia ba aban tuku 3:00 hodi rona desizaun”, Advogadu Privadu Pedro Apariçio hateten hafoin audénsia julgamentu iha TDD.
Prosesu julgamentu ne’e prezide hosi juiza, Ercila da Costa, Ministéiru Públiku reprezenta hosi prokurador Matias Soares no prokuradora Lidia Soares, arguidu sira hetan asisténsia legal hosi advogadu privadu Pedro Apariçio,Ligia Araújo, no advogadu internasionál Duate Carneiro. (*)
PUBLISIDADE
