PTR ne'e halo ona enkontru ida ho Primeiru Mininistru Taur Matan Ruak iha tinan foun ne'e atu haree utoan servisu tribunál nian.

Nia informa ba Xefe Governu katak orsamentu 2019 no 2020 nian la'o ho rezultadu di'ak.

Nia espera OJE 2021 bele solusiona problema sira-ne'ebé durante ne'e tribunál sira enfrenta.

"Kona-ba servisu ne'ebé lao iha tinan liu ba ne'e, buat hotu la'o másimu entaun pasa husi tinan 2020 ba 2021 servisu di'ak liután, ho tinan ne'ebé liu ona, iha nível finalizasaun prosesu tribunál sira nomós ho nível jestaun administrasaun nian tanba prosesu ne'e iha indikasaun katak nia estatístika ne'e loron ba loron tun beibeik", nia ko'alia iha Palásiu Governu, segunda (11/1).

Nia esplika, ba jestaun nian iha 2020 hasoru difikuldade orsamentu tanba Dotasaun Osamentu Temporáriu (DOT) ka rejime duodesimál maibé tribunál konsege halo buat balun ho orsamentu kiik-oan.

Prezidente Tribunál Rekursu ne'e haktuir, se karik orsamentu ba 2021 nian iha sei planeia halo ezekusaun ida-ne'ebé di'ak tanba ezekusaun husi tribunál nian tenki kumpri regra ne'ebé iha.

Enkuantu Tribunál Rekursu halo kontrolu ezekusaun orsamentu ba intituisaun seluk entaun tribunál nia ezekusaun tenke kumpri regra sira- ne'ebé estabelese on.

"Ho tempu ne'ebé limitadu ho problema ne'ebé ita hasoru daudaun ne'e, ita presiza iha ekipa ne'ebé di'ak atu haree ezekusaun orsamentu tribunál nian ho di'ak," katak Prezidenti Tribunál Rekursu.(*)