Nia dehan, traballadór nain-rua ne'e ba iha Koreia Sul la'ós halo servisu seluk, maibé sira nafatin halo servisu tuir orientasaun ne'ebé kompañia kontratór fó ba sira mak atu lori osan.

"Lori osan ba-mai, mais só ke sira na’in-rua lahatene loos lori osan ne'e ba ne'ebé. Kuandu lori osan ba mai, halo transaksaun osan husi agen ida ba agen ida, ne'e ita tenke husu hatene osan ne'e saida. Mais lae, ida ne'e erru ida ke traballadór sira halo ne'e lahatene. Ne'e mak ema deskonfia katak osan ne'e keta halai ba buat droga ka buat sira ne'e mak ema keta deskonfia hodi kaer ne'e karik", Filomino Soares hateten ba jornalísta sira iha nia kna'ar fatin Bekora, Kinta (07/01).

Filomeno esplika, bazeia ba regra ne'ebé aplika iha ema nia nasaun katak, bainhira lori osan ba-mai ho montante ne'ebé boot, lei bandu no bainhira polísia deteta, tenke kaer hodi submete ba prosesu investigasaun bazeia lei ne'ebé vigora iha ema nia nasaun.

Diretór ne’e hatutan, tuir kontratu ne'ebé hala'o entre governu nasaun rua (Koreia Sul ho TL), katak traballadór sira ne'e ba servisu iha área rua mak hanesan peskas ho fábrika nian, maibé tuir adidu sira informa ba nia katak dala-ruma servisu ne'e kompañia sira bele muda fleksívelmente traballadór sira ba iha ne'ebé de'it.

"Só ke sira mak ladun hatene simu kna'ar ida ne'ebé agora sira hala'o ne'e, sira ladun husu didi'ak katak ida ne'e osan ba saida nian. Ida ne'e mak agora ita seidauk hatene loos tanba iha ne'ebá sira lori osan-boot hanesan ohin ha'u hatete katak lori osan boot, ne'e kríme iha ne'ebá", nia subliña.

Maski nune'e, tuir informasaun ne'ebé sira hetan liuhusi reprezentante traballadór TL iha Koreia Sul katak, daudaun ne'e adidu traballu, servisu hamutuk hela ho embaixadóra, no Ministériu Justisa Korreia nian atu bele haree kona-ba asuntu refere.

"Mais ida ho inisiál AS mak hetan ona sentensa, ba hetan kadeia tinan tolu, ida fali ho inisiál CA ne'e sei iha prosesu. Sira nain-rua ba ne'e servisu iha área ne'ebé agora dadauk governu kontratu ne'e", nia informa.

Kona-ba informasaun loloos ba kompañia ne'ebé fó servisu ba traballadór nain-rua ne'e, nia dehan, sira seidauk hatene, maibé área servisu ne'ebé dadaun ne'e governu Korreia fó maka iha fábrika ho peskas, nune'e dala-ruma sira servisu kleur durante tinan-lima liu ona ho kompañia, entaun empregadór koñese no fó fiar ona ba sira atu bele lori osan.

"Ida ne'e mak seidauk detekta loloos sira servisu iha fábrika ka peska ka, maibé realidade servisu ne'ebé agora la'o ne'e, sira lori osan, só ke sira la husu loloos osan ne'e ba rezultadu rendimentu iha saida, husi ida ne'e mak ita lahetene", nia tenik.

Entretantu, traballadór timoroan nain-rua ne'e orijinalidade husi munisípiu Likisá ida ho naran inisál AS maka obrigadu kumpri pena prizaun durante tinan-tolu, no CA ne'ebé nia prosesu kazu iha hela tribunál, maibé sira iha relasaun família besik malu, no daudaun ne'e adidu sira sei akompaña hela prosesu kazu ne'e to'o hetan rezultadu finál.

Alende ne'e, governu liuhusi SEFOPE hamutuk ho diretór jerál no ekipa tékniku sira mós nafatin halo kontatu ho adidu servisu timoroan nian iha Korreia Sul hodi atualiza nafatin informasaun mai governu TL.(*)