Tuir observasaun www.tempotimor.com iha terrenu nota katak Susar to'o iha edifísiu Komjer PNTL Kaikoli, iha tuku 09:03 oras Timor-Leste, ho nia advogadu na'in-ida.

Molok hakat ba sala investigasaun "Susar" mós kumpri regra serka sanitária hanesan fase liman ho hand sanitizer.

Antes ne'e tuir fonte komfirmadu husi Klibur Tane Aas Obra Maun Boot Kay Rala Xanana Gusmão katak, PNTL liuhusi servisu Investigasaun Kriminal liliu Unidade Krime Organizadu fó mandadu notifikasaun ba Susar atu ba tuir investigasaun iha loron kinta (01/04).

Mandadu notifikasaun ne’e baze legal mak, lei Kódigu Prosesu penal artigu 91 to’o 94, lei kódigu penal Timor-Leste no dekretu lei No. 09/2009-lei Orgánika PNTL.

Haree ba notifikasaun ne’e Susar atu marka prezensa iha kuartel Jerál PNTL, Servisu InvestigasaunNasionál Kriminál, iha loron kinta (01/04/2021, oras tuku 09:00 otl, hasoru investigadór, iha sala Unidade Krime Organizadu no transnasional atu submete ba prosesu identifikasaun bazia ba artigu 53 kódigu prosesu penal Timor-Leste.

Ba notifikasaun ne’ebé simu, Amaro da Costa ‘Susar’ hatete, nia parte simu duni karta notifikasaun, maibé nia deklara durante ne’e nunka halo krime ruma.

"Sim, ohin dader Sr. SIK Migi mak lori ba iha ha'u-nia uma iha kampung baru, besik saúde nian ne'e, entaun nia foti surat ne'e, nia fó ha'u haree ba hanesan ne'e, ha'u la hatene ha'u-nia sala sáida, ha'u nunka halo krime ida, derepente lori surat ba ha'u hakfodak fali", dehan Susar iha Sekretariadu Nasional KTAOMX, Palapasu, kuarta (31/03).

Susar hatuta, “Dehan ita-boot aban tuku 9 tenke ba iha SIC ne'eba para foti deklarasaun, mais ha'u la hatene, deklarasaun ne'e ha'u sala saida bele ba foti iha ne'eba. La esplika, depois dehan, sé karik ha'u la ba, sira sei mai foti ha'u lori ba, kondena ha'u kódigu penal artigu 53, problema ha'u la hatene”, esklarese nia.

Líder KTAOMX dehan, karta ne’ebé nia parte simu la esplika oituan, depois ba mak bele presta deklarasaun, maibé presta deklarasaun ne’e sei la ko’alia buat ida tanba nia parte lahatene nia sala.

"Ha'u aban ba ho ha'u-nia advogadu akompaña ha'u, tan buat ne'e ha'u tauk oituan, tan polítika dadaun hanesan ne'e, ha'u mós ki’ik, ita la hatene buat ida, derepente lori surat ba, ita la hatene buat ida ha'u mós tauk tenke lori ha'u-nia advogadu akompaña ha'u, maluk rsira, la barak maibé na'in-5 hanesan ne'e sei tuir ha'u-nia kotuk par ba iha ne'eba buat ruma sira haree, ha'u mesak ba, tanba polítika keta sira hanoin at ba ha'u karik", deklara nia.

Hanesan sidadaun nia sei kumpri, kontribui no la ses husi lei. “Sira fó surat ne'e ha'u tenke ba duni kumpri orden, nu'udár ema timoroan atu serví ba rai, no povu ida ne'e, ha'u tenke kumpri, ha'u labele hases aan husi lei”. (*)