"Ha'u hatete hanesan ne'e tanba señora ne'e servisu nu’udar asesora jurídika iha rekursu umanu iha sekretariadu Parlamentu Nasionál. Tanba lei anti korrupsaun la permite atu fen-laen ka oan servisu hamutuk iha instituisaun públiku ida”, dehan deputada Carmelita iha plenária Parlamentu Nasionál (PN), segunda (18/10).

Tanba iha artigu 87 husi lei númeru 7/2020 kona-bá Medida Prevensaun no Kombate Korrupsaun (MPKK), inklui mós dekretu lei 19/2011, kona-bá avaliasaun trabaladór sira husi administrasaun públika la permite atu fen-laen ka oan servisu hamutuk iha instituisaun públiku ida ka ajente públiku liuhusi relasaun ho konflitu intrese iha desizaun no selebrasaun kontratu iha aktu hodi prevalese ba sira nia-an.

Pozisaun bankada CNRT ko’alia ne'e tanba, asesora jurídika internasionál ida iha Rekursu Umanu husi Sekretariadu Parlamentu Nasionál (PN) nian, ne'ebé mak prepara kritériu tomak no prepara kontratu servisu nian, bainhira aplikante ne'e rekrutadu.

Aleinde rekursu umanu mak hatene sistema no nesesidade saida de'it mak públiku hatene, no aplika ba vaga. Nomós dokumentu sira ne'e rekursu umanu mak prepara, hafoin parlamentu nasionál deside loke ba públiku atu ajudikasaun direta.

"Serake ida ne'e laiha konflitu de intrese, rekursu umanu mak loke vaga no partisipa iha prosesu rekrutamentu tomak”, afirma nia.

Tanba ne'e, CNRT hakarak fó hanoin no husu ba Meza Prezidente Parlamentu Nasionál no Sekretáriu Jerál PN, atu tetu didi’ak wainhida foti desizaun.

"Ha’u hakarak fó hanoin hikas nu’udar timoroan, tanba dala barak ita sira ne'ebé mak toma desizaun, ita la konfirma didi’ak to'o ikus ita sira ne'e mak ba hatan”, dehan nia.

Tanba kazu deputadu Antonio da Conceição, uluk nu’udar Ministru Turizmu no Komersiu, ho de'it asinatura ne'e tenke toma responsabilidade perante justisa até ohin loron kazu seidauk rezolvidu.

"Aleinde kestaun hirak ne'e ita mós iha kestaun etika mós atu halo kontratu ba ema ruma”, dehan nia.

Hatan ba kestaun ne'e, Prezidente Parlamentu Nasionál (PN), Aniceto Longuinhos Guterres Lopes, rekoiñese nia mak foti desizaun hodi fó kontratu ba sidadaun fen ho lae husi nasaun Cabu Verde, maibé laiha intensaun ba konflitu interese. 

"Señor Sekretáriu Jerál asina de'it, desizaun ne'e husi ha'u, tanba hau intende saida mak konflitu de interese ne'e, konflite entre intrese ema ne’ebé mak hola desizaun ho ema ne’ebé atu halo servisu ne'e, e ha’u laiha interese ruma ho ema Kabuverdianu, biar nia fen laen”, dehan nia. (*)