Tuir informasaun ne’ebé parte Komandu Polísia Nasionál Timor-Leste (PNTL) Munisípiu Lautein rekolla katak, insidente ne’e mosu kauza husi problema pasadu inklui problema ki'ik sira, vítima rasik sempre hato'o iha parte seguránsa, nune'e suspeitu inisiál A lasatisfas hodi hakotu vítima nia vida.
"Iha parte sira ne'e kazu ruma akontese aumezmu problema ki'ik, maibé parte vítima sempre hato'o keixa ba Polísia, entaun ida ne'e mak kauza husi halo nervu suspeitu depois ba asaltu halo omesidu ba vítima ne'e tuir informasaun, maibé nia prosesu profundu ita kontinua ba oin", dehan Komadante PNTL Munisípiu Lautein, Superintendente António Rego Fernandes, ba www.tempotimor.com liuhusi telefone, sábadu (11/12).
Hafoin akontesementu ne’e, transporta kedas vítima ba Ospital Nasionál Guido Valadares (HNGV) Dili hodi submete ba autopsia, enkuantu suspeitu rasik Komandu PNTL Munisípiu Lautein kaptura kedas hodi lori ba sela.
Iha loron 11 fulan-dezembru tinan 2021 aprezenta suspeitu ba Ministéiru Públika hodi hein prosesu tuir dalan legal.
Xefe Suku Kakavei, Mario Dias Quitas informa, kronolojia nia parte ladun hatene, maibé kazu ne’e, akontese duni iha Aldeia Paya, Suku Kakavei iha oras meudia suspeitu inisiál A hakotu vítima nia vida.
"Sira ta'a malu nia kronolojia ha'u lahatene, tanba foin dadaun ne'e ami mós halo verifikasaun ho komisaun veteranu sira iha Suku ne'eba, derepente telefone ba sira fó informasaun katak, buatamak ne'e ta’a tiha ona ita-nia feton ida, entaun ha'u bolu xefe aldeia ami mai lalais mais la konsege salva", katak Mario.
Entertantu, vítima Matilda dadaun iha prosesu autopsia. (*)