"Prezidente Repúblika, Francisco Guterres 'Lú Olo' promulga ona Dekretu-Lei atu implementa medida seguransa alimentar previstu  iha Lei n°8/2021, 3 maiu, ne’ebé  altera Lei n° 14/2020, 29 dezembru, refere ba Orsamentu Jerál Estadu 2021 no aprovasaun medida ba apoiu sósiu-ekonómiku", dehan Xefe Kaza Sivíl Prezidente Repúblika, Francisco Maria de Vasconcelos liuhusi komunikadu imprensa ne'ebé www.tempotimor.com asesu, tersa (14/12).

Tanba haree ba impaktu negativu husi pandemia Covid-19 iha ekonomia nasionál mak Governu propoin alterasaun ba lei 14/2020 ho medida foun oioin, inklui medida seguransa alimentár. 

"Lei ne’e fó kbi’it ba Centro Lojístiku Nasional (CLN), atu halo kontratu ho produtór lokál no/ka ho operadór komersiál sira seluk ho hetan ai-hán nesesáriu hodi fahe ba ita-nia ema no família sira ho rendimemtu ki’ik tebes", dehan nia.

Liuhusi sosa ai-hán, husi agrikultó sira hodi fahe ba sidadaun no família vulnerável liu, "Estadu Timor-Leste insentiva ita-nia produtór sira atu hasa’e sira-nia produsaun no nune’e, kontribui ba família agrikultór sira hodi moris-di’ak liu. Tanba fahe produtu husi agrikultor sira ba ita-nia ema no família timoroan sira ne’ebé vulnerável liu, Estadu Timor-Leste hatudu katak tau duni matan ba ita-nia ema iha tempu susar".

Dekretu-Lei ida ne’e fó atensaun espesiál ba família sira ho rendimentu laliu dólar amerikanu 1,90 loron ida. Atu define sesé mak iha direitu ba apoiu espesiál ida ne’e, entidade  responsável sira  sei uza dadus husi rejistu uma-kain ida-idak iha suku ida-idak husi Ministériu Administrasaun Estatal no husi Ministériu Solidariedade Sosiál no Inkluzaun. 

Ai-hán ho valór dólar amerikanu tolunulu (US$ 30.00) sei fó ba sidadaun ne’ebé rejista-an iha “Livru Rejistu  Uma Kain” nu’udar Xefe família ka, bainhira labele  simu, sei reprezenta husi membru ida husi Uma-Kain ne'e, ho otas 17  ba leten.

Medida ida ne’e sei implementa ho osan husi Fundu Covid-19 ne’ebé tama iha Orsamentu Jerál Estadu no sei implementa to’o 31  dezembru 2021 maibé MECAE bele hatutan tan.

Diploma ne’e aprova iha Konsellu Ministrus iha 27 outubru 2021, tama iha Prezidénsia Repúblika iha 8 novembru 2021 no Prezidente Repúblika promulga iha 10 Dezembru 2021.

Ministru Koordenadór ba Asuntus Ekonómiku, Ministru Finansas, Ministru Admnistrasaun Estatal no Ministra Solidariedade Sosiál no Inkluzaun mak sei regulamenta Dekretu-lei liuhusi diploma konjuntu ida kona-ba oinsá implementa hodi benefisia ba sidadaun no uma-kain sira ho rendimentu la liu dólar amerikanu 1.90 loron ida. (*)