Tempotimor (Baukau)-Sekrétariu Jerál Konsellu Vetéranu Munisípiu Baukau, Manuel da Costa Soares informa, durante verifikasaun dadus veteranus iha Munisípiu Baukau barak tauk halai ses tiha husi juramentu.
"Problema barak liu mak bainhira to'o iha juramentu rein bandeira jura ba rai lulik barak mak halai labrani, balun dehan ba uma foti dokumentu ba la fila ona", dehan Manuel, kuarta (15/12).
Nune’e, Konsellu Veteranu Munisípiu Baukau konsidera sidadaun sira ne'e iha intensaun atu halo falsifikasaun, lós duni ema hotu partisipa no kontribui ba luta, maibé tenke konta ho lolós.
Konsellu Kombatentes Libertasaun Nasionál (CCLN-sigla Portugues) sei valoriza ema hotu-hotu, maibé husu ema hotu lalika inventa dadus veteranu atu halo todan ba orsamentu jeral estadu ne'ebé atribui no ajuda povu tomak.
Entertantu, verifikasaun dadus veteranu iha Munisípiu Baukau remata ona iha Postu Administrativu Baguia, Baukau Vila no Laga, enkuantu Kelikai, Venilale no Vemasse sei kontinua fali iha Fulan-Fevereiru tinan 2022. (*)