"Seidauk vasina ne'e iha rihun 11.171, doze primeiru ita atinji ona pursentu 85, doze segundu ita atinji pursentu 71," dehan responsavel vasina AstraZeneka doze primeiru iha Munísipiu Baukau, Artemizia Guterres ba www.tempotimor.com iha kna'ar fatin reamate, kinta (17/03).
Lansamentu ba vasina AstraZeneka doze dahuluk iha Munísipiu Baukau, komunidade balun rezeita simu vasina.
"Ami halo dor to dor, komunidade barak rezeita, tanba dehan vasina laiha benefisiu ba sira, sira dehan dook husi sidade, virus ne'e husi ne'ebé mak kona ami," nia hatete
Maibé, pesoal saúde nafatin esforsu liuhusi tama sai uma (dor to dor) hodi konvense komunidade balun fó hanoin benefisiu husi vasina atu hakbesik aan ba sentru saúde hodi simu vasina.
Stock vasina AstraZeneka iha Munísipiu Baukau dadaun iha viál 425, sei auguenta durante fulan-marsu tinan 2022 atu fó vasina ba komunidade sira.
"Tarjetu husi nasionál minimu ne'e 80 pursentu, maksimal mak 100 pursentu," nia informa
Dadaun sidadaun ne'ebé simu ona vasina AstraZeneka doze dahuluk atinji ona pursentu 85, enkuantu doze daruak pursentu 72, falta pursentu 8 atu kompleta metas nasionál.
Entertantu vasina AstraZeneka lansa iha Munísipiu Baukau hahú husi loron 12 fulan-abril tinan 2021, to'o ohin loron, iha sidadaun rihun 62,146 simu ona doze dahuluk no rihun 53,107 mak simu doze daruak. (*)
