Tempotimor (Baukau)‐Servisu Saúde Munísipiu Baukau hakarak atu rekruta tán pesoál saúde, tanba seidauk sufisiente.
Diretór Servisu Saúde Munísipiu Baukau, Domingos Reinaldo da Costa Guterres, hatete, planu ba futuru hakarak postu tratamentu iha área remotas sira tau pespál saúde na'in-3 hodi atende populasaun menus husi rihun 5, enkuantu ba postu saúde minimu pesoál saúde na'in-5 hodi atende ba populasaun rihun 5 ba leten.
"Pesoál sira ne'e, atu kompletu iha ne'eba depende ba orsamentu hodi rekruta, Ministéru Saúde loke vaga ba ema sira rejime espesial ne'e, Médiku, Parteira, Enfremeiru, Saúde Públiku ho tán tekníku aliadu seluk hanesan Analista, Farmatista, Anutsionistra Adentista sira ne'e mak tau iha ne'eba," dehan nia iha kna'ar fatin Reamare, segunda (13/06).
Nune'e, Servisu Saúde Baukau hato'o ona pedidu ba Ministériu Saúde atu rekruta tán pesoál saúde hodi bele halo atendementu ba komunidade.
"Ba pesoál sira, ita prezisa tebes, tanba iha fatin sira ne'ebé dook pesoál saúde lasufisiente atu halo atendementu ba komunidade sira," nia argumenta
Enkuantu médiku iha Baukau na'in-69, Parteira na'in-60 no Enfremeiru na'in-59, maibé balun hala'o hela estudu, nune'e difikulta ba komunidade sira bainhira prezisa atendementu.
Pesoál Saúde hirak ne'e, servisu iha Sentru Saúde 9 kompostu husi Postu Saúde 28 ne'ebé estabelese iha Munísipiu Baukau. (*)