Tuir informasaun ne’ebé www.tempotimor.com asesu husi AIFAESA, kuarta (22/06)  katak, AIFAESA liuhusi Xefe Gabinete Inspetór Jerál, Filipe Gomes, akompaña husi Diretór DPORAL, Ângelo E. Belo no Diretór Departamentu Operasaun Viriato Paulo, hala'o enkontru ho World Food Programme (WFP), iha sala Gabinete Inspetór Jerál – Matadouru, hodi ko’alia kona-ba koordenasaun servisu.

Husi sorumutu ne'e reprezentante WFP ko'alia kona-ba fornesimentu ai-hán ba programa Sesta Bázika liliu kualidade produtu, presu no kuantidade produtu, nomós Sistema Cobo Tool Box ne'ebé bele fasikita tékniku sira atu hala'o servisu iha terenu.

Koordenadór ba programa Sesta Bazíka atuál hanesan Xefe Gabinete Inspetór-Jerál, Filipe Gomes hatete, AIFAESA mós presiza duni kooperasaun sira hanesan ne'e, hodi bele fó vantajen di'ak liliu ba parte iha AIFAESA, ne'ebé mak ho frakamente hatene liliu iha nasaun Timor-Leste.

Tanba AIFAESA rasik mós sei presiza rekursu lubuk ida, atubele reforsa liután servisu AIFAESA hakna'ar-an.

Maibé observasaun ne'ebé hala'o husi WFP ba programa Sesta Bázika hatudu katak, fornesedór distibui mós ai-hán tasak no sujere atu fornesedór sira bele fahe ai-hán ne'ebé kualidade no saudável ba benefisiáriu sira.

Hanesan Koordenadór ba programa Sesta Bázika Filipe Gomes hatutan wainhira asesu kona-ba tipu produtu sira ne'e, no provas hatudu duni iha ai-hán tasak mak parte AIFAESA sei haree asuntu refere, no sei halo koordenasaun ho Ministériu Turizmu Komésiu no Industria (MTKI) no Sekretáriu Estadu Kooperativa (SEKOOP), hodi bele asesu ba lista distribuisaun. (*)