"Kritika Governu liuhusi Minístra Saúde no Diretór Klínika Maliana, tanba lakohi salva ema nia vida, tanba ema inan ho oan mate dala ida, sa atendimentu mak ne'e, ema isin rua, husik de'it hanesan ne'e oan moris iha dalan klaran no inan mate iha Dili", dehan nia iha Parlamentu Nasionál, segunda (05/02).
Nia haktuir kronolojia katak, iha sesta semana kotuk, ha'u nia alin feto balun isin rua atu partus transfere husi Postu Administrativu Lolotoe mai iha Maliana depois pessoal saúde di'ak iha Hospital Maliana atende labele, haruka mai iha Hospital Nasional Guidu Valadares HNGV Dili.
Hafoin pessoal saúde halo tiha karta transferensia mai, la iha pessoal saúde ida mak akompaña família refere.
"Infelizmente la iha ema ida tuir (pessoal saúde), maibé so haruka de'it ho nia laen ho nia aman mak mai Dili ho kondotor, mai to'o tiha iha Atabae labarik moris tiha iha ne'ebá, iha ne'ebá nia aman ho nia laen de'it atu halo nusá", nia lamenta.
Nune'e, família konsege tama iha klínika Atabae, maibé atendimentu kontinua labele, nune'e ikus trasnfere pasiente mai iha Hospital Nasional Guidu Valadares HNGV.
"Nune'e to'o iha Likisa labarik mate, nune'e nia inan mai iha Hospital Nasional Guidu Valadares mate tan", nia afirma.
Tanba ne'e, husu ba Primeiru Minístru, Taur Matan Ruak atu hadomi povu Timor Leste, entaun trata povu hanesan labele husik ema ida iha kotuk.
"Sá Ospital ida mak haruka ema moras todan mai Dili la iha perawat ka doutor ida mak akompaña", nia akresenta.
Tanba ema sira ne'ebé akompaña pasiente mesak mane de'it, nune'e labele ajuda inan feton ikus mai oan no inan mate iha fatin ne'ebé la hanesan. (*)