Ministru Dionisio dehan, iha informasaun balun ne'ebé nia parte simu hatete katak Timor-oan balun foin to'o iha aeroportu maibé halai kedan ba subar.
"Timor-oan balun ne'ebé tuir informasaun ami rona katak balun husi Xina to'o mai ona mais halai kedas ba subar, subar iha sira-nia uma," dehan ministru ne'e iha palasiu governu, Segunda (03/02).
Tan ne'e, nia apela ba Timor-oan ne'e atu aprezenta aan ba mediku sira hodi bele halo teste no tama iha fatin izolamentu.
"Halo favor ida tenke ba aprezenta aan ba ministériu saúde ou ospital no inan-aman sira tenke lori sira ba par tama iha fatin izolamentu ka observasaun nian, tanba ne'e perigu tebes," dehan Babo .
Bainhira mai nonook de'it no subar tan, karik hetan ona infeksaun husi virus corona bele fó perigu boot ba nasaun.
"Kuandu mai nonook de'it, ita la hatene sira moras iha ka lae depois da'et tiha ba ema sira seluk mak foin hatene, ne'e labele, tanba ne'e tenke kuidadu ho situasaun sira hanesan ne'e".
"Timor-oan balun mai la aprezenta aan, ba liu kedas sira-nia familia, tanba sira hanoin katak di'ak hela, maibé ne'e labele," dehan nia.
Tan ne'e, Babo apela ba see de'it mak foin fila husi Xina atu tenke liu husi prosesu teste no tama iha fatin izolamentu hafoin la identifika moras mak bele fila ba uma.