Hanesan publiku hatene, governu Timor Leste planu hela atu evakua estudante Timor-oan iha Wuhan, Xina. Konsellu Ministru rasik aprova ona orsamentu ba prosesu evakuasaun ne'e.
Maibé mosu difikuldade tanba aerportu barak mak hahú la simu ona viajen husi Xina.
Deputadu Bankada Fretilin Marito Mota dehan, tuir informasaun ne’ebé nia hetan, daudauk ne'e aeroportu internasional iha Indonezia, Singapura, Malazia no Filipina taka ona ba pasajeiru sira husi Xina.
Tanba ne'e, deputadu ne'e dehan, tarrde ona atu evakua estudante timor oan na'in 17 iha Xina.
"Ba Ministru MNEK, defeza seguransa no ministra Interina saude katak, ita-nia atuasaun ka prevensaun tarde uitoan, iha semana kotuk ami levanta iha plenaria iha ne'e, tanba ita hatene mudu preokupa ba virus Corona", dehan deputadu ne'e iha parlamentu nasional, Segunda (03/02).
Tanba defisil ona atu evakua, deputadu ne'e dehan governu presiza buka meius atu haree oinsa atendimentu ba estudante sira iha ne'ebá, liu-liu ba sira-nia hahaan no kondisaun.
"Indonezia nian (sira-nia sidadaun na'in) 245 iha Xina evakua tiha ona mai Indonezia horibainrua kalan no agora iha ona fatin observasaun ba sidadaun ne'e rasik, ha'u hanoin ita nian defisil ona, tanba rai barak taka tiha ona ba sidadaun Xina atu tama", dehan nia.
