Vijilánsia Totál To'o Falla Prevene Covid-19 iha TL Featured

Ministra Saúde Elia dos Reis konversa ho Passazeiru sira wainhira too iha Portaun entrada Aeroporto Internasional Nicolao Lobato Komoro Dili foin lalais ne'e. Ministra Saúde Elia dos Reis konversa ho Passazeiru sira wainhira too iha Portaun entrada Aeroporto Internasional Nicolao Lobato Komoro Dili foin lalais ne'e. Foto :FB/MS

Tempotimor (Dili) - Ministra Saúde interina ne'ebé lidera Ekipa Task force Coronavirus Disease 2019 (Covid-19) hatete, portaun entrada tau xave, nune'e halo vijilánsia totál, maibé ikus mai ema ida pozitivu Covid-19.

Ministra Saúde Elia dos Reis Amaral, ho fiar aan hateten, ekipa Task Force ne'ebé lidera prevene Covid-19 tau atensaun to'o vijilánsia totál iha portaun entrada, nune'e bainhira deteta suspeitu ruma diretamente kuarentena obrigatóriu.

Deklarasaun ne'e halao hafoin soru-mutu ho Prezidente Repúblika, Francisco Guterres Lú Olo, iha Palásiu Prezidensiál, Bairru-Pité, Kuarta (18/2).

"Ita asegura katak ho rezultadu ne'ebé ita iha intermu husi parte vijilansia portaun entrada mak sai xave ho ne'e mak ate a data ita seidauk hetan kazu konformadu, espera katak ba oin sei hanesan ne'e i haree liu tan ba parte dalan sira ne'ebé ilegal, ita sei atensaun ba ida ne'e," dehan Elia, iha Kuarta (18/3), liubá.

Maibé deklaraun ne'e sees malu ho realidade, liu de'it eit loron rua, Sesta (20/03) suspeitu ida hetan sintoma Covid-19, iha Baukau no diretamente transfere kedas ba Dili hodi halo teste Covid-19.

Depois ne'e, ohin, Sábadu (21/03), mosu kedas suspeitu 1 ne'ebé pozitivu kona Covid-19.

Liuhusi konferénsia imprensa iha Palácio das Cinzas, Ministra Saúde (MS) interina, Elia dos Reis hatete, deteta ona suspeitu ida iha Timor-Leste pozitivu ona ba moras Covid-19.

"Kazu Primeiru Covid-19 deteta ona iha Timor-Leste, ema ne'e foin fila husi rai-li'ur, agora dadauk izola hela iha nia uma, nia kondisaun diak uitoan", dehan Elia

Nune'e Departamentu Vijilánsia Epidemolójia investiga kedas kazu ne'e atu analiza risku ba públiku no ema ne'ebé kontaktu ho suspeitu.

"Ema ne'e agora daudaun izola hela iha fatin adekuadu saúde nian, departamentu vizilansia sei kontinua monitora ema ne'e loron-loron no ida ne'e la boot ba públiku", tenik nia.

Nia hatutan, kazu seluk tan sei hein rezultadu husi laboratoriu, nune'e apela ba populasaun tomak favor boot kumpre nafatin meius sira ne'ebe orientasaun husi Organizasaun Mundiál Saúde (OMS). (*)

Rate this item
(1 Vote)
Last modified on Saturday, 21 March 2020 19:11
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.