Sentru Media Covid-19 fó esplikasaun ida ne'e relasiona ho preokupasaun públiku ba istoria kontatu husi pasiente Covid-19.
Tuir Sentru Media Covid-19, defenisaun kontatu tuir OMS mak ema ne’ebé iha kontaktu besik ho kazu pozitivu loron 2 antes to’o loron 14 hafoin ema pozitivu ne’e hetan sintomas.
"Nune’e, iha ita-nia kazu pozitivu dahuluk ne’ebé fó sai ona (iha Sesta), hatudu sintomas iha loron 8 fulan Abril 2020, mak konsidera nu'udar risku ba Covid-19 mak sira ne’ebé iha kontaktu ho kazu positivu husi loron 6 fulan Abril to’o loron 22 fulan Abril 2020," esplika Sentru Media Covid-19 liu husi ninia pajina facebook, Tersa (14/04).
Kona-ba kondutór no ajudante bus Maliana ne'ebé tula pasajeiru sira husi Mota-ain mai kuarentena iha Dili, Sentru Media Covid-19 dehan, sira laiha kontatu ho kazu pozitivu.
"Entertantu sofer ho ajudante hirak ne'e laiha kontaktu ho kazu pozitivu ne'ebé anunsia ona iha periudu ne'ebé define dadaun".
Kontaktu besik tuir defenisaun OMS no planu kontijensia mak:
1. Kontaktu ho distansia menus husi Metru 1 durante menutu 15
2. Iha kontaktu direto ho ema pozitivu
3. Pesoal saude ka mediku sira ne’ebé halo tratamentu ba infetadu kazu pozitivu
4. Sira ne’ebé hela hamutuk ho ema ne’ebé infetadu kazu pozitivu
Ho esplikasaun ne'e, Sentru Media Covid-19 husu ba públiku atu mantein kalma, labele paniku no hela iha idak-idak nia fatin.
"Kontribuisaun ne’ebé di'ak liu no efetivu husi publiku mak mantein iha idak-idak nia fatin, labele sai ba liur bainhira la persiza, no kontinua halo tuir pratika ijiene ne’ebé fo sai ona antes".
