Doutor Daniel Murphy (79) ne'ebé durante ne'e luta nafatin, la hatene kolen, hodi fó asistensia saude ba Timor-oan sira fila hikas ba Aman Maromak nia kadunan Santu.

Tuir informasaun ne'ebé www.tempotimor.com asesu, dr. Daniel nia iis kotu iha Tersa (14/04) maizumenus tuku 20.00.

Tuir informasaun, iha Tersa dader, dr. Daniel sei fó asistensia saude ba pasiente sira ne'ebé halo tratamentu saude.

Maske nune'e, to'o notisia ne'e hatuun, www.tempotimor.com seidauk konsege hetan komfirmasaun ofisial kona-ba kauza husi dr. Daniel ninia mate.

Dr. Daniel Murphy, nu'udar sidadaun Amerika moris iha Alton Iowa iha loron 23 Setembru 1944 ne'ebé sai fundador Klinika Bairro-pite dedika ona nia vida hodi fó asistensia saude iha rai balun hanesan Mozambike, Laos, Nikaragua, no Timor-Leste.

Dr. Daniel hahú nia misaun iha Timor-Leste iha tinan 1998. Durante referendu, dr. Daniel ajuda halo tratamentu ba gerileiru sira inklui Timor-oan lubuk ne'ebé sai vitima husi torturasaun militar no ema pro-autonomia sira.

Hafoin TL ukun an, dr. Daniel dedika an hodi fó asistensia saude ba Timor-oan sira ne'ebé sofre moras TB, HIV/SIDA no moras seluk tan ho gratuita.

Bainhira klinika Bairro-pite monu ba krize no mosu ezijensia balun atu pasiente sira hahú selu, dr. Daniel mantein ho nia pozisaun hodi fó asistensia saude sein husu doit metan ida ba sira ne'ebé mai halo tratamentu saude.