Tanba desizaun governu aplika serka sanitária no konfinamentu domisiliáriu obrigatóriu iha kapital Dili hahú loron 9 fulan-marsu, maibé populasaun balun halo viajen ba Munisípiu hodi hases-an husi Díli iha loron 5 to’o 8 fulan-marsu tinan.

“Nafatin apela ba populasaun ne’ebé saí husi Dili ba munisipiu sira seluk, entre dia 5 to’o dia 9 de Marsu madrugada, molok serka sanitária hahú tama iha vigor iha Dili, atu favor ida aprezenta-an ba autoridade saúde sira ne’ebé besik-liu, iha imi-nia hela fatin, hodi bele hetan atendimentu”, hatete Rui liuhusi Zoom conference, domingu (21/03).

Haree ba situasaun númeru kazu Covid-19 ne’ebé kontinua sa’e iha kapitál nasaun, Munisípiu Baukau no Vikeke, mak ekipa saúde no Sentru Integradu Jestaun ba Krize (SIJK) kontinua buka tuir kontaktu besik kazu pozitivu ne’ebé fó sai antes.

Esforsu ne’ebé iha mak kontinua buka tuir kontaktu besik hodi bele halo teste PCR ba populasaun balun iha aldeia no Bairu sira husi Munisípiu afetadu husi transmisaun lokál.

“Apela mós ba komunidade iha Munisípiu sira hotu, wainhira hatene kona-ba ema ruma ne’ebé sai husi Dili molok serka sanitária hahú iha Dili, halo favor informa hela autoridade sira atubele halo atendimentu ba sira”, dehan nia.

Maibé husu nafatin ba populasaun iha Timor-Leste tomak, liuliu iha Munisípiu Dili, Baukau ho Vikeke atu nafatin hakmatek, lalika sé tilun ba lia-anin ka rumores.

Husu ba populasaun atu pratíka nafatin medida preventiva hodi Uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk, mínimu metru ida ho balun.

Númeru kazu iha loron 21 fulan-marsu Sentru Integradu Jestaun Krize rejista kazu pozitivu 55 no kazu ativu ativu hamutuk 206, no iha tolu mak rekooperadu. (*)