Tempotimor (Dili)-Polisia Nasional Timor-Leste (PNTL), liuhusi Unidade Polísia Marítima (UPM) hetan ona mate-isin RM nian iha loron segunda (17/05), iha área Kristu Rei, maizumenus tuku 10:13 otl.
Matebian ne’e hamutuk ho nia maluk na'in-6 seluk ne’ebé mout iha Tasi klaran iha loron sábadu (15/05) husi Dili ba Postu administrativu Ataúro, Munisípiu Dili.
Sidadaun na’in-7 ne’e na’in-1 hetan ho kondisaun mate, na’in-3 ne’ebé hetan ona ina loron domingu (16/05) ho kondisaun moris no na’in-3 seluk ne’ebé seidauk hetan.
Tuir observasaun www.tempotimor.com nota, hafoin hetan, polísia UPM evakua kedan matebian RM nia isin-mate ba iha sala mortuáriu Hospitál Nasionál Guido Valadáres (HNGV), Bidau hodi kontinua ba prosesu tuir mai.
Entretantu, iha loron sábadu (15/05), matebian RM ho nia maluk na'in 6 seluk sai husi Dili atu ba viájen ho Bero ba Postu administrativu Ataúro, maibé to'o iha tasi-klaran, hetan insidente, tanba mout ho Bero iha tasi-klaran.
Sidadaun na'in-7 ne'e, polisia UPM liuhusi nia atividade operasaun, konsege hetan ona na'in 3 mak hanesan, Tomé, Nuno, Efrem ho kondisaun moris, no RM foin hetan tan ho kondisaun mate, enkuantu sei hela na'in 3 seluk mak to'o oras ne'e seidauk hatene sira nia paradeiru.(*)