Matebian Eduardo de Jesus Barreto ho "Dusae" (69), hakotu iis iha Ospitál (RS Siloam-Jakarta ) Indonézia, loron 26 fulan-maiu tinan 2021, maizumenus tuku 08:00 oras Indonézia nian, tanba sofre moras fuan.
Oan feto husi Matebian, Ligia Madalena konta, iha loron 16 fulan-maiu tinan 2021, matebian hetan atakasaun moras pulmaun iha nia rezidénsia, Postu administrativu Glenu, Munisípiu Ermera.
Hafoin ne’e, família sira deside lori ba Ospitál Glenu, maibé to'o Ospitál, médiku sira, deside transporta mai Hospital Nasional Guido Valadares (HNVG) Díli hodi hala'o tratamentu saúde iha sala ICU.
Maibé, tanba ho kondisaun gráve, iha loron domingu (23/05) ne'e, médiku sira deside transporta urjente matebian hodi ba hala'o tratamentu iha Indonézia iha Ospitál Siloam-Jakarta, maibé hafoin liu loron tolu de'it matebian hakotu ona iis (mate).
Matebian "Dusae", moris iha loron 14 fulan-agostu tinan 1951, iha Suku Raimerhei, Postu administrativu Ermera, Munisípiu Ermera, maibé matebian husik hela nia fen kaben ho nia oan hamutuk na'in-sia (9).
Durante jornada moris, matebian envole-'an iha partidu CNRT hanesan mós fundadór ba partidu nian, iha tinan 2007 to'o 2017 hetan fiar husi partidu hodi ba reprezenta povu iha Parlamentu Nasional (PN).
Iha lejíslasaun anterior, matebian nu'udár Xefe bankada CNRT no Vise Prezidente Parlamentu Nasionál (VPPN), nune'e mós ativu hanesan membru ba konsellu estadu to'o nia remata peregrinasaun iha mundu.(*)