Tempotimor (Dili)-Sekretáriu Jerál partidu Frente Revolusionáriu Timor-Leste Independente (FRETILIN), Marí Alkatari ho nia família, dadaun ne'e infetadu ona Covid-19, tanba teste ne'ebé halo hatudu rezultadu pozitivu covid-19.

"Maluk doben sira hotu. Buiberes e Mauberes Asuwa'in. Hothotu hatene iha loron hira liuba, ha'u dehan Covid-19 tama ona ha'u-nia uma. No ha'u nia bei-oan rua mak infetadu. Ha'u dehan, ha'u sei di'ak hela iha tempu ne'ebá. Agora ha'u atu dehan ba Povu tomak katak ha'u rasik infetadu ona. Ha'u-nia esposa no oan feto mós infetadu", deklara Alkatiri, liuhusi karta komunikadu ne'ebé www.tempotimor.com asesu ohin, tersa (24/08).

Maske nune'e, nia parte la moe atu hatete ba públiku kona-ba situasaun realidade ida ne'ebé hasoru.

"Ha'u fiar buat hothotu sei la'o tuir siénsia médika nia kapasidade atu mitiga. Ita-nia brani mai husi ita ida-idak nia fiar no hametin ho ciência nia kapasidae", dehan Mari.

Husi tempu uluk kedas to'o ohin timoroan sira sempre brani hasoru dezafiu oioin ne'ebé mai husi tasi, husi foho no husi laloran ka rai okos.

"Ita hasoru maibé sempre manán biar balu, barak tebes mak sakrifika sira-nia an rasik. Atu habadak ha'u-nia lian ha'u hakarak halo apelu ba Maluk doben sira hotu, Camaradas ka Adversários, liliu ba ha'u -nia oan ka bei-oan doben sira iha Timor-Leste tomak atu kuidadu-an ba. Favor hadok-an husi Covid-19 agora ho variante Delta. Ha'u mós hatene, ho ha'u-nia esperiénsia rasik, atu hadok nusa de'it ita nunka bele livre 100%. Maibé sempre di'ak liu", afirma nia. (*)