Sidadaun sira ne'e PNTL kaptura iha kuarta (08/09), maizumenus tuku 02 madrugada, tanba hala'o atividade arte marsiál iha tempu Konfinamentu Obrigatóriu Domisiliáriu (locdown) iha Munisipiu Dili.
"Horisehik depois ita kaptura lori sira mai iha komandu munisípiu Dili, molok atu halo prosesu, ita bolu uluk sira parte saúde nian mai halo swab test ba sira, ba ema hamutuk na'in-117, mane 102, feto hamutu 14. Husi swab test ne'e, hatudu katak ema na'in-haat (4) pozitivu COVID-19 ninian, entaun entrega kedas ba sira sentru integradu, e lori kedas ba fatin izolamentu ninian", informa Komandante PNTL Munisípiu Dili, Superintendente Henrique da Costa, iha Kaikoli, kinta (09/09).
Pasiénte Covid-19 na'in-4 ne'e, bainhira kompleta ona loron 14 iha izolamentu, sei submete hotu sira ba prosesu investigasaun kriminál, tanba viola rezolusaun Governu númeru 113/2021, kona-ba bandu halibur malu iha tempu konfinamentu.
Iha ne'e mós viola rezolusaun Governu númeru 15/2017, ne'ebé regula kona-ba bandu hala'o atividade arte marsiál no arma branka.
"Mais la siknifika katak, sira tama ona izolamentu be sira-nia prosesu ne'e ita para, la'e. Sira kumpri lai ida 14 dias, depois 14 dias remata, sei rekupera husi parte Covid-19 nian, mak mai ita-nia parte investigasaun sei kontinua filafali ba sira na'in-4 ne'ebé mak ba izolamentu", esplika nia.
Dadauk PNTL detein hela sira iha hela sela, tanba prosesu seidauk remata, maibé prosesu tarde liu to'o aban.
"Ita tenke aprezenta ona ba ministériu públiki ka iha oras 48 nia laran ne'e, ita tenke aprezenta ona ba ministériu públiku kona-ba nia progresu ninian. Agora, ida ne'e ita aprezenta ba ne'ebá (ministériu públiku), deside 72 oras kompletu, molok 72 oras ne'e, ita aprezenta ona ba ministériu públiku", dehan nia.
Durante prosesu identifikasaun hahú husi loron kuarta (08/09) to'o kinta (09/09), evidénsia ne'ebé PNTL prende hanesan, motorizada hamutuk 91 no karreta 2. (*)