“Iha semana kotuk, Ministra Saúde mai iha ne'e, haklaken katak buat hothotu di'ak hodi ita hotu fó sujestaun ne'ebé barak atu señora Ministra foti lalais urjente ba ita-nia kestaun saúde, maibé realidade hatudu katak eselénsia Ministra Saúde la konsidera sujestaun hodi foti medida ne'ebé di'ak, iha ospitál Nasionál Guidu Valadares, kondisaun nafatin labarik na’in-rua ka tolu toba iha kama ida de'it”, hatete nia liuhusi deklarasaun politika iha PN, segunda (07/02).

Tanba ne’e, Ministériu Saúde tenke iha ona medida prinsipal ida atu inan-aman sira labele lakon tan sira nia-oan, tanba to'o agora óbitu moras dengue nian aumenta.

Tuir dadus ne’ebé bankada KHUNTO iha, kompara ho kazu 2021 no 2022, tinan ne'e preokupante tebes, iha de'it fulan-janeiru nia laran, maibé kazu dengue hamutuk 1.161 ona no óbitu 20-resin, ida ne'e maioria iha Munisípiu Dili.

"Ho ida ne'e Bankada KHUNTO husu ba Ministériu Saúde favor boot ida book-an ba, lalika husik atu moras dengue aumenta ho númeru óbitu. Favor buka mekanizmu ne’ebé di’ak no lalais atu kazu dengue labele aumenta tan, se moras Covid-19 de'it ne’ebé akontese iha mundu ita-bele hases, tanba sá moras dengue ita seidauk iha solusaun”, hatete nia.

Deputada Bankada Frente Mudansa (FM), Isabel Maria Barreto Freitas Ximenes, ejize ba Ministériu Saúde atubele halo fomigasaun ba eskola públiku no privadu sira atubele proteje nafatin estudante sira labele hetan tata husi susuk ne’ebé mak bele kontamina sira ho dengue.

"Husu para MS ne'e liga tebes ba kestaun saúde ne’ebé mak agora akontese maka’as sai hanesan surtu nasionál para bele ba halo fomigasaunba eskola sira iha Munisípiu tomak, liliu ita haree parte sira ne’ebé mak kazu as tebtebes hanesan iha Komoro iha eskola lima iha ne'eba, e husu ba Ministériu Saúde atu halo fomigasaun”, dehan nia.

Ministru Asuntu Parlamentar no Komunikasaun Sosiál (MAPKomS), Fancisco Martins Jerónimo hatete, ba kestaun fomigasaun iha Dili laran ne'ebe mak Ministériu saúde halo ona durante ne'e sei kontinua nafatin to'o atuasaun remata.

Dadauk, Ministériu Saúde liuhusi ekipa sei halo iha Vera Cruz ho Maskariña hahú husi tuku 6 dader to'o tuku 9, no iha lokoraik husi tuku 3 to'o 6 ho balun.

Purenkuantu ba loron tersa (08/02) sei halo iha Suku Madohi, Postu Administrtivu Don Aleixo, hahú iha oras hanesan, no sei kontinua filafali iha Vera Cruz no hafoin kontinua ba Postu Administrativu Don Aleixo.

"Nomós sei kontinua to'o bainhira iha Dili laran ninia atuasaun remata”, dehan Ministru Francisco.

Tanba ne'e fomigasaun agora halo nafatin, no saida mak deputadu sira husu atu halo jerál, Governu sei halo, tanba sei foku ba fatin sira ne’ebé afeta uluk no bainhira hotu hafoin halo fomigasaun jerál ba sira seluk. (*)