"SEKoop sei fasilita formasaun ba membru sira. SEKoop sei la husu buat ida, basta de'it imi halo komprimisiu katak depois de formasaun, imi tenke nakfilak ba kooperativa”, hatete Sekretáriu Estadu Kooperativa (SEKoop), Elizário Ferreira, durante konversa ho grupu produtór sira iha Suku Betanu, sesta (30/07).
Aleinde ne'e, SEKoop sei halo esforsu oinsá mak bele promove produtór sira-nia produtu ba merkadu.
"Kuandu hetan ona merkadu, labele ohin oferese, aban laiha ona. Maibé, tenke sustentável. Iha rai barak, agrikultór ne'e mak riku liu. Mais iha ita-nia rain tanba seidauk iha kondisaun”, dehan nia.
Koordenadór grupu produór Betanu, Julião Noronha da Costa promete, sira prontu atu la'o hamutuk ho governu liuhusi hari’i kooperativa produsaun iha suku laran.
"Ami prontu transforma-an ba kooperativa hamutuk ho governu”, dehan nia.
Atividade produsaun, sira iha kedas tinan 2016 to'o oras ne'e, rejista ona membru hamutuk ema na'in-80, mai husi Aldeia Lewai ho Raifusar iha Suku Betanu, hi-fi halo natar ho to'os ho luan hamutuk ektare 49, hodi kuda batar, forekelin no fore-metan.
"Durante ne'e ami-nia produsaun kuandu kolleta iha tinan ida, ami sei hetan 100 itál tonelada ba batar ho forekelin. Ba merkadória, ami hanesan dalan ba ami mak seidauk iha. Puré-zemplu hanesan ema mai sosa, sira sosa dala-ruma karon ida ou rua, bele to'o karon 10, mak ne'e deit. Mais atu barak liu ne'e laiha. Ne'ebé atu ba merkadória ne'e mak menus ba ami”, hatete nia.
Husi produsaun ne'ebé iha, grupu sira mós kontribui ona tonelada hamutuk atusida-resin ba programa Seta Bázika ne'ebé kompaña sira sosa.
"Iha momentu ne'e, ami kontribui ba programa sesta bázika, hamutuk 135 tonelada, ne'ebé iha tinan ida ne'e ami kontribui ba sesta bázika. Ida ne'e, kompaña sira sosa batar ho forekelin”, informa nia. (*)
