Deputadu Bankada PLP Francisco de Vasconcelhos hatete, desizaun atu troka kandidatu membru governu pendente ne'e kompetensia konsellu diretiva AMP.
Iha fulan hirak kotuk, nia hatutan, AMP liu husi Konferensia deside ona atu la halo subtituisaun ba membru governu pendente.
"Iha fulan kotuk liu ba halo konferensia ida iha Golgota deside katak sei la halo subtituisaun ba naran hirak ne'e. Tanba ne'e laiha razaun par atu halo subtituisaun ba naran membru sira nian," dehan Vasconcelhos iha PN, Kinta (25/09).
Kona-ba deklarasaun husi deputada banka Khunto Olinda Guterres atu troka kandidatu membru governu pendente, Vasconcelhos dehan, deputadu sira fó nia deklarasaun maibé desizaun iha konsellu diretiva AMP nia liman.
"Iha deputada balun ne'ebé fó nia deklarasaun maibé la reprezenta AMP tanba iha konselu dirativa mak lidera entaun desizaun ne'e mai husi ne'ebá," nia afirma.
Iha fatin hanesan, deputadu CNRT Patrocino dos Reis hatete, deklarasaun deputada husi Khunto ne'e opiniaun pesoál, tanba seidauk iha konferénsia kona-ba atu troka kandidatu membru governu pendente.
"Hanesan deputada husi partidu Khunto ne'ebé halo nia itervensaun ka fó hanoin kona-ba subtitui (kandidatu) membru governu ne'e sei konsidera hanesan deklarasaun pesoál. Tanba Aliansa Mudansa ba Progresu kompostu husi partidu tolu," dehan deputadu Patrocino.
Molok ne'e, deputada Khunto Olinda Guterres deklara iha plenária PN katak, Khunto prontu ona troka kandidatu membru governu ne'ebé la hetan pose husi Prezidente Repúblika.
"Ba ami, Khunto, preparadu ona atu troka ami-nia ema na'in rua ne'e. Tanba ne'e liu husi ha'u-nia intervensaun ne'e, média sira mós rona hotu, ami prepara ona ami-nia ema, karik PLP no CNRT prepara ona, tanba bainhira pedidu PR nian mai atu husu konfiansa ba rai li'ur ne'e nunka mais akontese, to'o mandatu tinan lima ne'e hotu mós Prezidente Repúblika la sai ba li'ur," Olinda deklara.
