Deputadu Noe da Silva ‘Buka Tuir’ ne'ebé asume hela kargu hanesan Prezidente Komisaun F trata asuntu Saúde, Seguransa Sosiál no Igualidade Jéneru iha Parlamentu Nasionál, tuir loloos marka prezensa iha plenária atubele introduz relatóriu ne'ebé mak komisaun F prepara ona atu aprezenta iha plenária loron tersa (01/02), maibé tanba kestaun saúde entaun la konsege partisipa.
Ho ida ne'e, meza PN deside fó kedas kompeténsia ba relatora husi Komisaun F nian hodi bele aprezenta relatóriu diretamente iha plenária laran.
“Tanba Vise ho prezidente mós moras hela, vise prezidente kakorok metin hela, keta sofre hela karik Omicrom, mais ha'u fó kedas tempu ba relatora Komisaun F nian”, dehan Aniceto iha plenária PN, tersa (01/02).
Relatóra Komisaun F, Helena Martins Belo hatete, kestsun Prezidente Komisaun F ho vise la marka prezensa iha debate no aprezentasaun relatóriu ida ne'e, tanba moras hela.
“Hanesan ohin, Prezidente hatete katak ami-nia Prezidente mós e ami nia vise mós moras, e agora dadauk nia kondisaun moras hela ho nia kakorok ne'ebé labele espresa duni, tanba ne'e mak ha'u diretamente ba kedas ona iha relatóriu”, esplika nia.
Iha debate no aprezentasaun relatóriu jeneralidade kona-ba proposta lei númeru 36/V (a4) ne'e prosede ba alterasaun dahuluk lei númeru 24/2021 loron 24 novembru ne'ebé hetan alterasaun husi lei númeru 10/2004, loron 24 Novembru kona-ba sistema saúde nian.
Nune'e sei halo debate hodi bele aprova mós medida asesionál sira no temporária vizilánsia sanitária iha lei Sistema Saúde hodi resposta ba Pandemia Covid-19. (*)