“Fiar metin, bainhira ha'u eleitu tán Prezidente tinan lima, ita sei la'o hamutuk buka hadi'a nafatin, hamutuk ho ha'u, ita kombate korrupsaun ne'ebé buras iha ita-nia rain, moras aat ida ne'ebé mosu fó kiak ba ita-nia povu. Konta ho ha'u, bainhira ha'u eleitu tán ba Prezidente Repúblika, sé mak hakarak halo korrupsaun, hanoin dala sanulu”, dehan Lú Olo iha kampaña dahuluk iha Oebau, Pante Makasar, Reziaun Administrativa Espesiál Oekuse Ambenu (RAEOA), kuarta (02/03).

Tanba Kompromisiu ne’ebé iha Kandidatu Prezidente Repúblika, Francisco Guterres sei hametin nafatin Sistema justisa iha rai laran, atubele prosasa kazu krime sira ne’ebé mosu iha Timor-Leste.

“Ha'u-nia kompromisiu, tenke hametin justisa iha ita-nia rain, tenke hametin ita-nia orgaun judisiál no tribunál sira, atubele halo servisu didi’ak par bele julga kazu sira konflitu intrese ou kazu krime ruma ne'ebé akontese iha ita-nia rain”, dehan Lú Olo.

Tanba durante iha mandatu Prezidente Repúblika períodu 2017-2023, promulga ona Lei balun atu kompleta sistema judisiáriu.

“Foin dadauk iha fulan tolu ka fulan haat ba kotuk, ha'u promulga tán Lei estruturadu ida ne'ebé atu hari’i ita-nia sistema judisiáriu no tribunál sira kompletu liután”, afirma nia.

Konteudu Lei ne'e, atu hari’i sistema iha Tribunál Munisípiu, Tribunál Rekursu no séi kria tán Supremu Tribunál Justisa iha aas liu, atu permite sidadaun sira hato’o rekursu.

“Sé bainhira sidadaun sira hakarak atu halo rekursu, rekursu ikus liuba iha Tribunál Supremu atubele julga sira-nia kazu. Prezente Repúblika, ha'u mak promulga Lei ida ne'e, atu hadi'a ita -nia sistema judisiáriu”, hatete nia.

Nune'e, kazu hotu sei la mate no hotu iha Tribunál Rekursu, maibé sei ba to'o iha Supremu Tribunál Justisa nian.

“Buat hirak ne'e hotu kaer hamutuk mak ha'u-nia kompromisiu, Prezidente Repúblika ida atu garante no kaer metin funsionamentu normál funsionamentu instituisaun Estadu nian iha tempu oin mai, hatete ba imi ha'u séi kumpri ida ne'e, atu hothotu funsiona ho di'ak”, dehan nia.

Tanba iha ema balun la komprende no intende lei sira ne'e, dalaruma iha Timor-Leste, ema jurista barak liu, mak ema sira ne'ebé estuda direitu lakohi ona atu halo interpretasaun ba Lei, no husik sira ne'ebé la estuda direitu halo interpretasaun.

Maibé, interpretasaun sira ne'e hotu, dala barak kahur ho polítika mak barak liu, no ninia implikasaun hamosu konflitu oioin iha rai laran.

Tuir orariu, iha loron 03 fulan-Marsu tinan 2022, kandidatu Francisco Guterres ‘Lú Olo’, séi kontinua atividade kampaña iha kampu futebol Glenu, Munisípiu Ermera. (*)