“Atu dezenvolve fali Timor-Leste atu liberta povu husi ki’ak tinan 20 ona maibé nafatin hakdasak. Ho Ida ne’e ita husu ba Timoroan ida-idak hanesan sidadaun Timor, ita-nia responsabilidade hanesan Timoroan, saida mak ita hakarak halo hodi liberta rai ida ne’e, se hein de’it ba ita-nia ukun-nain sira, ita-nia politika sira ka ita hotu sai sujeitu iha prossesu ida ne’e, tanbá ne’e sidadaun hotu tenke prepara-an ho dia’k”, dehan Isabel Ferreira iha kampaña eleitorál ba komunidade postu administrativu Lekidoe, Aileu, kuarta (02/03).

Tanba haree prossesu luta ukun rasik-an, líder sira lidera no organiza, maibé povu ativu no sai sujeitu iha prossesu nee, tanba ne’e hetan ukun rasik-an husi povu nia votu iha referendu Timor-Leste sai referendu no independente.

“Entaun ita-nia votu mak determina depois ukun ba ita-nia moris, iha ukun rasik-an ita halo eleisaun kada tinan 5 ba prezidente repúblika atu hili ita-nia politiku atu ba ukun nasaun ida ne’e, depende ba povu nia eskolla no desizaun ne’ebé mak di’ak hodi lori nasaun ida ne’e tuir ita hotu nia hakarak”, dehan nia.

Bainhira nasaun ida sai risku no forte depende ba sidadaun sira, tanba ne’e nia mai ho mehi no hanoin ida de’it, hodi hamutuk ho povu sira iha paz, estabilidade no moris di’ak, se hakarak moris di’ak, tenke kria ambiente ida ne’ebé mak paz no estabilidade, maibé paz no estabilidade depende ba ema ida-idak nia hahalok.

Tanba sidadaun sira prepara-an atu loron ida sai ukun na’in, tenke ukun ho domin no justisa atu lori povu sai husi mukit no ki’ak.

“Ha’u mai ho ha’u-nia kandidatura ida ne’e ho preokupasaun ida hodi fó hanoin ba povu Timor laran tomak katak, tempu too ona ita hotu atu sai sujeitu iha prossesu ida ne’e, labele tuir hodi hein de’it atu líder sira mak halo, tanba ne’e ha’u hakarak husu ba sidadaun hotu tenke prepara-an di’ak hodi simu estratejia ida ne’e, atubele dezenvolve Timor-Leste sai nasaun ida ne’ebé mak riku no seguru defende ita hotu nia responsabilidade”, dehan nia.

Ekipa Sussesu Kandidata Isabel da Costa Ferreira iha Munisípiu Aileu, Juliana Imaculada hatete, Kandidata Isabel da Costa Ferreira kompete atu hatudu feto Timor mós bele hodi ukun nasaun ida ne’e.

Tanba planu vizaun no missaun ba kandidatura númeru sorteiu 1 ne’ebé bele assesu liuhusi mídia sosiál atubele hatene kona-ba politika, oinsá nia bele assume nia kna’ar hanesan kandidatura Prezidente Republika períodu 2022-2027.

Ho ida ne’e, husu ba populasaun iha Postu Administrativu Lekidoe hodi rona sira-nia metodu politika, tanba demokrasia la’ós mai husi hatun malu, maibé demokrasia ne’e mai husi konsiénsia rasik. (*)