“Kampaña eleitorál iha dia 2 to'o 3, Marsu 2022, ita louva ita-nia kandidatu sira liuliu ekipa susesu halo servisu ho di'ak halo kondena ho di'ak, to'o ohin kampana la'o normál, ema termus seguransa sira kompri hela”, dehan nia iha Salaun CNE, Kolmera, sesta (04/03).

Maske iha buat balun ne’ebé akontese, maibé husu nafatin ekipa susesu kandidatu sira katak tenke asegura seguransa ba kampaña nune'e labarik sira labele tama.

“Labarik envolve iha fatin kampaña, sai hanesan preokupasaun sidadaun sira-nian no orgaun eleitorál sira hotu, ne'e sai kestaun ida ba ita haree, husu ba sira atu respeita nafatin Kalendáriu ne'ebé sira hato'o ona no evita mini kampaña tanba lei ida ne'e laiha”, esplika nia.

Tanba ne’e, husu mós ba partidu polítiku sira atu respeita nafatin kalendáriu ne'ebé deside hamutuk ho nia ekipa sira, nune'e fasíl ba ekipa observadór sira no mídia sira no seguransa sira bele halo observa didi’ak kampaña ho eleisaun ne'e ho di'ak.

“Evita mós apoiante no militante sira husi Munisípiu seluk ba tuir kampaña iha Munisípiu seluk, tanba agora situasaun Covid 19 hela, respeita mós regra saúde ninian, sira halo kampaña iha Munisípiu ida inklui de'it eleitór husi Munisípiu ne'e rasik”, afirma nia.

Ba kampaña Eleitorál labele foti militante husi Munisípiu seluk ba tuir kamapaña iha fatin seluk, nune’e evita ataka maluk, no evita temi naran Grupu Arte Marsiál sira iha kampaña laran.

“Lei dehan kampaña ne'eba eleisaun prezidensiál, ema sira ne'ebé Prezensa ne'e eleitór sira, sei la lori naran seluk, karik sira balun hakilar iha kampaña ho Árte Marsiál ami husi CNE sei halo karta ida ba sira, nune'e labele hamosu problema iha kampaña ne'e”, dehan nia.

Iha Ne’e, CNE bandu partidu polítiku sira hakilar naran grupu Arte Marsiál nian iha tempu kampaña, agora dadaun balun hatudu ona imajen no balun hakilar iha kampaña laran. (*)