"Ha’u husu ba fiskais partido CNRT atu atensaun, matan moris neon nain, tenke hamri’ik iha estasaun vota hodi haree didi’ak, labele baruk, tanba manipulasaun no falsifikasaun bele mosu iha kontajen votu”, dehan Xanana iha kampaña kandidatu Horta iha Manatutu-Villa, Munisípiu Manatutu, sábadu (05/03).

Tanba ekipa fiskál husi partidu CNRT sira ne'ebé sei ba akompaña iha sentru votasaun sira, atu haree didi’ak iha sentru votasaun hodi evita labele mosu irregularidade iha prosesu kontajen votu.

Maibé husu Manatutu anan atu vota ba Kandidatu Prezidente Repúblika (PR), José Ramos Horta ho numeru 14 hodi bele ba sai Prezidente Repúblika.

“Ha’u nu’udar Manatutu anan apela ba inan aman sira Manatutu anan hotu atu fó votu vitória ba númeru 14 hodi lori Ramos Horta ba Prezidente Repúblika períodu 2022-2027”, afirma nia.

Durante 20 ona Timor-Leste ukun-an, estadu la'o neneik maibé sei metin liután ida ne’e mak ema hotu nia esperansa, tanba ne'e tenke hili ema foun ida ho vizaun foun hadi'a nasaun ne’e.

“Manatutu tenke agrasede tanba, maromak haraik Manatutu oan na’in rua matenek tebes iha Timor-Leste no mundu internasionál hodi bele hamutuk lori Timor ba oin”, afirma nia.

Kandidatu Prezidente Repúblika, José Ramos Horta hatete, nia parte nafatin promete atu hadi'a inkonstitusionalidade ne’ebé komete husi atuál Prezidente Repúblika Francisco Guterres ‘Lú Olo’, liuhusi dalan diálogu.

“Ha’u sei halo repozisaun ordén konstitusionál no ordén estadu direitu demokrátiku, Horta ‘promete’, iha nia mandatu Prezidente Repúblika, períodu 2022 to’o 2027, sei korríje erru sira ka sala sira ne’ebé durante ne’e mosu, hodi hatuur filafali ordén konstitusionál”, dehan nia.

Horta fiar katak, dalan ikus mak tenke halo dizolusaun ba Parlamentu Nasionál, atubele hakotu ona violasaun masiva no sistemátika ne’ebé durante akontese, hodi prevene hamosu prezidente inkonstitusionál iha futuru, ne’ebé bele lori krize boot ba Timor-Leste.

Durante Komísiu kampaña loron dahat, José Ramos Horta nian iha Postu Administrativu Manatutu Vila, hetan partisipasaun másimu husi komunidade, simpatizante no militante CNRT inklui partidu no movimentu sira.

Aleinde hetan mós akompaña direita husi observadór Komisaun Nasionál ba Eleisaun sira (CNE) no Sekretariadu Tékniku Administrasaun Eleitorál (STAE), observadór Internasionál sira, PDHJ inklui hetan seguransa másimu husi membru Polísia Nasionál Timor-Leste (PNTL). (*)