“Ba ha'u, ba oin, agrikultura, edukasaun, saúde, tolu ne'e mak prioridade, e ha’u fi'ar maun boot Xanana mós fi'ar ida ne'e”, dehan nia hafoin entrega Komputadór, Printer no sasán seluseluk ba Eskola Bázika Filiál (EBF) Railaku Vila, seste (11/03).
Ba setór agrikultura ida sei ko'alia mós seguransa alimentár, liliu haree irrigasaun, estrada rurál, nomós haree valór osan atu selu transporte hodi tula sasán produsaun husi munisípiu ba sidade Dili.
Tanba orsamentu atu selu transporte ninia valór kuandu sa'e, ida ne'e sei fó difikuldade boot ba inan-aman sira ne'ebé mak servisu todan iha Munisípiu sira hanesan Ermera, Aileu, Maubise atu lori sira-nia produtu ba fa’an iha sidade Dili.
Kona-ba seitór edukasaun ne'e la'ós de'it haree ba asuntu alunu, maibé tenke haree bee-moos ba eskola, no tenke hadi'a merenda eskolar di'ak liután, tenke tau matan ba inan sira atu labele iha sub nutrisaun, labarik sira labele sai husi uma la hán buat ida, kalan balun toba de'it e la hán buat ida.
“E saúde la'ós enfermeiru, doutór, saúde mós nutrisaun, hadi'a alimentasaun, tanba ne'e mak buat ne'e la'ós slongan de'it la’e, buat ne'e intergradu didi'ak ha’u hatene, e la'ós komplikadu e la'ós karun demais”, esplika nia.
Maibé preokupasaun profesór kona-ba estatutu profesór kontratadu ne'e kandidatu Horta simu pedidu ida ne'e husi profesór balum iha Postu Administrativu Same atubele ko'alia ida ne'e.
Tanba preokupasaun profesór ida ne'e nu’udar problema boot ida, presiza ko'alia ho Primeiru Ministru, liliu Ministru Edukasaun Juventude no Desportu (MEJD) para bele rezolve.
Diretór Estabelesimentu Intergradu iha Eskola Báziku Filiál (EBF) Railaku Vila, Sebastião de Oliveira, husu Kandidatu Prezidente Repúblika José Ramos Horta atu tau halo koordenasaun ho Governu hadi’a estatutu profesór bainhira eleitu ba Xefe Estadu.
“Avó ha’u hanoin, ha’u reprezenta eskola iha ne'e, husu ba avó, depois de 19 marsu karik deside avó eleitu ba Prezidente Repúblika, ami husu avó atu tau matan liliu oinsá mak bolu atensaun ba Governu liliu Ministériu Edukasaun Juventude no Desportu (MEJD) atu haree kona-ba profesór kontratadu sira ne'ebé mak kuaze tinan 10-resin ona to'o agora sira-nia estatutu nafatin kontratadu”, dehan nia. (*)