“Ha'u hakarak hato'o mós boa sorte ba kandidatu sira ne'ebé ho votu barak liu ne'ebé agora atu ba segunda volta eleisaun nian, hein katak kandidatu ne'ebé sei hetan konfiansa husi Povu Timoroan bele kontinua serbisu di'ak sira ne'ebé mak prezidente sira uluk nian halo ona, hanesan Reprezentante Repúblika no Independénsia Nasionál nian, no garante supremu ba funsionamentu di'ak órgaun soberania no instituisaun sira ita-nia Estadu Direitu Demokrátiku nian”, dehan nia iha Palásiu Prezidente Repúblika Bairopite, tersa (22/03).
Maibé hato'o parabéns ba povu Timor-Leste ne'ebé mak partisipa ona iha eleisaun Prezidensiál ne'ebé halo rame festa demokrasia iha Timor-Leste.
“Iha períodu eleisaun prezidensiál nian ne'ebé ita halao ne'e, ha'u aproveita okaziaun ne'e hodi fó parabéns ba sidadaun no kandidatu sira hotu ne'ebé partisipa ona, ho respeitu malu no toleránsia, iha Festa Demokrátika ida-ne'e”, agradese nia.
Ba Kandidatu sira ne'ebé mak eleitu ba Pprezidente Repúblika atu kolabora nafatin Instituisaun Estadu nian hodi buka kresimentu moris di'ak ba sidadaun sira.
“Ha'u mós dejeza katak ida ne'ebé mak eleitu bele estabelese kolaborasaun institusionál di'ak ida ho Governu no órgaun sira Estadu nian hodi buka kresimentu ba moris-di'ak sidadaun sira-nia no hodi kumpre objetivu nasionál sira ne'ebé boot ba dezenvolvimentu Nasaun ida-ne'ebé moderna, segura, saudável no próspera liu”, afirma nia. (*)