“Husu ba Ministériu ka Ministru Transporte hatete de'it dehan ró ne'e at ona, la bele halo ona, para hodi povu ne'e hatene dehan ró ne'e la bele para demais iha tasi laran ne'e, tanba tinan-tinan tau osan ba halo manutensaun ba ró sira, ida ró nakroman nian”, dehan nia intervensaun iha Plenária Parlamentu Nasionál, tersa (29/03).

Tanba preokupasaun ida ne'e hato'o ona ih debate Orsamentu Jerál Estadu 2022 ne'ebé husu atu halo manutensaun ba Ró Nakroman maibé to'o ohin loron seidauk rezolve.

“Ha'u atu husu de'it señor Sekretáriu bele hato'o ba Ministériu revante liliu ha'u-nia pergunta iha diskusaun orsamentu debate 2022, kona-ba atu halo manutensaun ba Ró Nakroman, ha'u sei lembra hela ha'u-nia pergunta ha'u husu iha loron sesta, ha'u dehan oinsá ho manutensaun ba Ró Nakroman e momentu ne'ebá señor ministru hatete dehan, aban sábadu ekipa ida manutensaun ne'e sei tun iha Timor-Leste maibé to'o ohin loron 2022 to'o tan abril ona seidauk”, informa nia.

Maibé pior liután sosa Ró ida ne'ebé boot, foun, kapaz tebes gasta osan barak Ró Berlin Ramelau halo oporasaun fulan ida de'it odamatan la di'ak ona.

Bainhira Governu la hadi’a Ró oinsá, deputadu sira hakilar segunda, tersa atu hadi’a ró ne'e, tanba osan ne'e osan Timor nian, la'ós osan Oekussi nian mesak.

“Ida ne'e ita hotu nia prekupasaun la bele Oekussi oan de'it, tanba osan ne'e osan Timor nian, la'ós osan Oekussi mesak, se Governu la hadi’a Ró ne'e, oinsá, deputadu sira hakilar segunda, tersa atu hadi’a Ró ida ne'e”, hatete nia.

Deputadu ne’e foti kestaun ne’e, tanba ema hotu hatene nia la'o ne'e, pasajeiru tama tuir de'it odamantan alternativu, odamatan ki’ikoan, taun ida ne'e mós halo terus negosiante sira agora atu tula karreta tula sasán ne'ebé laiha, mak husu Governu para tau atensaun netik.

“Ha'u uluk husu dehan see bele karik rekruta nakoda ne'e husi estranjeiru atu ajuda nakoda Timoroan ne'e, tanba Timoroan ne'e mesak ladún hatene ka nusa mak odamatan de'it at ona”, hatete nia.

Hatan ba preokupasaun ne'e, Sekretáriu Komunikasaun Sosiál (SEKOMS), Merício Juvinal dos Reis ‘Akara’ hatete, preokupasaun sira ne'e nia sei enkamiña ba ministériu relevante sira atu haree.

“Ohin ha'u rona preokupasaun, formasaun balun tuan ne'ebé iha prosesu atu responde, balun foun ne'ebé hanesan baibain ami sei enkamiña ba ministériu relevante, mais ha'u asegura katak pergunta sira sei hetan proposta”, dehan nia. (*)