Ministru Transporte no Komunikasaun (MTK), Miguel Marques Goncalves Manetelu hala’o vijita kortejia ba Ajénsia TIC TIMOR I.P. iha ámbitu aniversáriu TIC TIMOR ba-dala VI, ho objetivu husi vijita ne’e, hodi haree diretamente servisu funsionáriu sira nomós observa fatin kada diresaun nian.

Iha biban ne’e, Ministru mós hala’o vijita ba sentru dadus Governu Eletróniku iha palásiu Governu. Alende ne’e Diretór diresaun sira mós halo esplikasaun kona-ba servisu diresaun nian liliu servisu tékniku.

Ba aniversáriu, Diretór Ezekutivu TIC TIMOR I.P, Roberto Caitano de Sousa Vicente hatete, nia parte Diretór Ezekutivu hamutuk ho Membru Konsellu administrativu no funsionáriu TIC TIMOR I.P. iha teritóriu Timor-Leste tomak, hakarak hato’o Feliz Aniversáriu ba-dala VI iha momentu importante ida-ne’e.

“Ami hakarak hato’o apresiasaun boot ba  funsionáriu sira hotu TIC TIMOR I.P. nian husi Nasionál to’o Munisípiu ne’ebé dedika-an tomak durante tinan lima nia laran hodi hetan rezultadu servisu sira ne’ebé progresivu tebes ba dezenvolvimentu Nasaun nian iha área Teknolojia, Informasaun no Komunikasaun”, dehan Reberto.

Diretór Ezekutivu TIC TIMOR I.P, Roberto Caitano de Sousa Vicente afirma, “Ami hakarak hato’o mós apresisaun aas ba ami-nia parseiru husi setór públiku no privadu, organizasaun non-governmentál, parseriu dezenvolvimentu sira, ba apoiu no servisu hamutuk iha periodu tinan lima nia laran. servisu sei barak iha oin, nune’e, agora la’ós tempu atu dehan “naton ona”. Ami sei servisu maka’as liután ho matenek ne’ebé investe iha Timoroan sira hodi dudu programa dijitalizasaun hodi sai duni realidade iha tempu oin mai”. (*)