“Objetivu prinsipal atu haforsa koñesementu mídia nia-sira nian iha área rua formasaun utilizasaun software no live report ba rádio komunidade sira tanba mundu modernu entaun ita tenke adapta sistema ho teknolojia tanba ema tama ona ba Podcast no Youtube karik iha software ruma oradór sira sei fahe iha formasaun atu fasilita mídia sira hodi divulga informasaun ne'ebé iha plataforma”, dehan Dirétor DNPDML, Jóse Da Costa, iha Hotel JL Villa, Fatuhada, kuarta (06/04).
Iha formasaun ne'e, partisipa husi reprezentante Rádiu komunidade sanulu-resin-hitu husi Munisípiu sira no mídia defisiénsia inklui Rádio Akadémika no Mídia Privadu sira kuaze sanulu resin no Mídia husi SEKOMS hamutuk na'in-lima no kada mídia Sira reprezenta ema na'in-ida hodi tuir formasaun.
Enkuantu Materia prinsipal mak Software no Live Report ne'ebé mak formandu sira sei hetan husi oradór sira.
Dirétor Jéral Ministériu Asuntu Parlamentares Komunikasaun Sosial (MAPKOMS), Fonciano da Cruz Leite hatete, mundu modernu teknolojia mós ajenda entaun presiza adapta mós avansu iha fatór hothotu inklui hahalok.
“Se ita la adapta entaun ema nia notísia tun tarde nia. Tanba ne'e, ita presiza halo adaptasaun ho progressu dezenvolvimentu teknolojia informasaun no komunikasaun ne'ebé relevante ho situasaun atual”, afirma nia.
Tanba ne’e, mídia ida-idak sempre esforsu-an maibé MAPKOMS iha kompeténsia atu hakbi'it mídia sira ho modelu kapasitasaun no formasaun bele adapta teknolojia ne'ebé avansadu ho modernu kredivel.
Nune’e atu ajuda jornalista rádiu nian atu avansa hodi utiliza sofware hodi halo transmisaun direita, tanba formasaun ne'e, importante atu hakbi'it rádio komunidade sira. (*)