Tempotimor (Dili)-Konsellu Superiór Partidu Kmanek Haburas Unidade Nasionál Timor Oan (KHUNTO), José dos Santos ‘Naimori Bukar’, aproveita kampaña kandidatu Prezidente Repúblika, Francisco Guterres ‘Lú Olo’, hodi gaba Governasaun ne'ebe lidera husi Primeiru Ministru, Taur Matan Ruak, tanba defende programa Governu nian ne'ebé sei fó benifisiu ba Povu.

“Ba ita-nia prezidente la mai, tanba nia kondisaun. Ba Sekretariu Jerál, maun boot doutor Mari Alkatiri, mak ami respeita, ba ita-nia aman Taur Matan Ruak, ita hothotu koiñese, nia mai hamriik iha ne'e hanesan Prezidente PLP, e nia mai atu organiza ita hothotu atu defende oitavu Governu. Tanba oitavu Governu nia programa ida ne'ebé mai agora atu fó benifísiu ba povu Timor-Leste”, dehan Naimori iha kampaña husi Kandidatu Lú Olo iha Munisípiu Ainaro, segunda (11/04).

Tanba programa Governu daualu nian ne'ebé mak iha, la'ós de’it haree ba partidu tolu, maibé inklui mós partidu CNRT no PD nomós ba partidu sira seluk.

Ho ida ne'e, husu ba militante no apoiante sira atu kuidadu labele iha ema ida mak bele sobu Governu ida ne'e to'o nia mandatu termina iha 2023.

“Tanba ida ne'e mak tenke kuidadu oitavu Governu ida ne'e, para laiha ema ida atu sobu, mak ita-nia Maun Taur Matan Ruak”, afirma nia. (*)