“Agora ha’u husu karik señor Doutor Ramos Horta Nobel da Paz, se nia eleitu sai Prezidente Repúblika mak Parlamentu Nasionál la fó pose ba nia karik agora oinsá, krize mosu ona, halo povu ne'e terus nafatin, orsamentu laiha, Governu la funsiona, ita tenke hakat filafali ba eleisaun foun ida, para atubele iha orsamentu”, dehan Lú Olo hafoin hala'o kampaña eleitorál iha Munisípiu Likisa, tersa (12/04).

Maske Kandidatu númeru ida hetan suporta husi Kay Rala Xanana Gusmão ho Partidu CNRT, hodi halo kompromisu bainhira Ramos Horta sai eleitu Prezidente Repúblika mak sei dissolve Parlamentu Nasionál.

“Sobu Parlamentu Nasionál ita ba para tan iha ne'ebé, halo tan krize boot ida iha Timor. Ida ne'e mak señor Doutor Kandidatu númeru hakarak, ida ne'e mak Kay Rala Xanana Gusmão hakarak, Lú Olo la lakohi ida ne'e”, hatete nia.

Pozisaun Lú Olo hakarak atu defende paz ho estabilidade nasionál, atu povu ida ne'e bele hakmatek iha nia uma, kaer sira-nia servisu hodi buka moris rasik, no lakohi tan krize iha rai laran.

“Maibé sira (Horta-CNRT) hakarak oin seluk, sira hakarak kria krize, para ita bele kontra malu, sira hahú filafali buat ne'ebé mak uluk iha 2006 hatete loromunu ho lorosa'e halai fahe malu”, dehan Lú Olo. (*)