Ho projetu Dekretu-Lei ne’ebé aprova aprezenta husi Primeiru Ministru, Taur Matan Ruak, ba Konsellu MInistru hodi halo diskusaun no aprovasaun.
“Alterasaun ba Dekretu-Lei nú. 14/2018, loron 17 fulan-agostu, ida ne’e ho objetivu atu inklui iha kompozisaun Governu Konstitusionál VIII, Sekretáriu Estadu Komunidade Timoroan iha Rai-Li’ur”, dehan Ministru Prezidénsia Konsellu Ministru, Fidelis Manuel Leite Magalhães, iha Palásiu Governu, segunda (16/05).
Ho integrasaun Sekretáriu Estadu Komunidade Timoroan iha Rai-Li’ur iha kompozisaun Governu Konstitusionál VIII, ne’ebé rekoñese nesesidade no importánsia atu asegura hodi hametin lasu komunidade timoroan iha rai-li’ur ho komunidade nasionál.
Nune’e mós urjénsia atu asegura mekanizmu ne’ebé efikaz liu atu envolve sidadaun ne’ebé hela no serbisu iha rai-li’ur iha prosesu dezenvolvimentu país nian.
Aleinde ne’e, hala’o mós liuhusi diploma ne’e, alterasaun daruak ba Dekretu-Lei nú.20/2019, loron 31 fulan-jullu, kona-ba orgánika Ministériu Negósiu Estranjeiru no Kooperasaun, ho forma atu garante armonizasaun ida-ne’e ho lei orgánika Governu nian.
“Ikus, aproveita oportunidade husi intervensaun lejislativa atu armoniza dispozisaun sira iha Dekretu-Lei nú. 14/2018, loron 17 fulan-agostu, kona-ba Ministériu Ensinu Superiór, Siénsia no Kultura, ho alterasaun hirak ne’ebé foin lalais ne’e aprova ba diploma legál kona-ba orgánika departementu governamentál ida-ne’e”, esplika nia. (*)
