“Tanba mós de'it ida resesu ne'e mak semana oin ita nafatin iha reuniaun plenária ordinária ida iha segunda ho tersa maibé iha tan estraordináriu iha dia 14 ne'ebé mak ita halo, e ida-ne'e sei iha prezensa mós husi Primeiru Ministru, se mai iha ne'e ita halo debate do estadu ida ho PM”, dehan Sekretaria Meza Parlamentu Nasionál (PN), Lídia Norberta iha PN, kuarta (06/07).
Maibé durasaun ba debate ida-ne'e iha oras 4 de'it tanba bazeia ba figura rejimentu husi Parlamentu Nasionál artigu 141, atu deputadu sira bele uza kompeténsia hodi debate ba estadu ho Primeiru Ministru.
“Entaun iha ne'ebá ita iha biban atubele iha oras haat, deputadu sira bele hato'o kestaun kona-ba balansu ka situasaun jerál governasaun iha Governu daualu ne'e, tinan haat ona governasaun ne'e ita iha ne'ebé ona, entaun ida-ne'e mak sei halo iha dia 14 de jullu semana oin”, afirma nia.
Atividade debate estadu ne'e nia modelu hanesan mós ho debate interpelasaun ida ne'ebé mak Parlamentu Nasionál halo ho Ministeriu Edukasaun Juventude no Desportu (MEJD) loron tersa (05/07). (*)