“Agora ita-nia sidadaun na’in-13 mós abandona hela iha Alemaña ne'ebá, ne'ebé ami tenke buka tuir, tanba sira mós iha ne'ebá moris susar oituan, ida ne'e imi la'o la hatete ba Governu ikus Governu buka tuir ne'e mak susar oituan, ne'ebé alin sira lalika la'o se laiha serteza”, dehan Ministra Adaljiza, bainhira hasoru malu ho Primeiru Ministru, Taur Matan Ruak, iha Palásiu Governu, segunda (11/07).
Tanba ne’e, Governu esforsu hela oinsá atu buka solusaun, dadaun ne'e Governu esforsu atu buka solusaun ba sidadaun sira ne’e, maibé husu atu labele kontinua halo viazen ba Europa sbainhira laiha garante.
Dadaun ne’e Governu mós esforsu hela atu repatria sidadaun feto na’in-7 ne'ebé antes ne'e ba servisu iha Abu Dhabi-Emirados Árabes Unidos no oras ne’e iha ona Jakarta-Indonézia.
“Atu haruka sidadaun na’in-7 mai fali Timor-Leste ne'e nia prosesu mak Governu buka hela, Governu tenta hela tanba ita laiha verba para selu, agora ita buka hela, karik Ministériu Solidaridade Sosiál no Inkluzaun (MSSI) iha osan entaun haruka sira fila mai Timor”, informa nia.
Timoroan na’in-7 ne'ebé iha Jakarta sei hein Governu haruka billete mak sira foin bele fila mai Timor-Leste hodi hasoru familia.
“Sira seidauk fila tanba sei hein ita-nia Governu haruka billete ba mak sira bele fila”, informa nia. (*)