“Enkontru semanál ho Prezidente Repúblika hodi ko'alia oituun asuntu balun kona-ba atividade sira no los kona-ba vizita Prezidente Repúblika nian ba Indonézia oinsá mak aban bainrua halo follow-up ba asuntu sira ne'ebé trata iha Indonézia no nia kontinuasaun”, dehan PM Taur hafoin finaliza audensia ho PR Horta iha Palásiu Prezidensial Bairo Pite, kinta (28/07).
Durante iha audénsia semanál ne'e, Xefe Estadu afirma pozisaun Prezidénsia Repúblika liuhusi nia gabinete oras ne'e dadauk nia Gabinete sei presiza relatóriu viajen servisu ba Indonézia, oinsá mak Governu bele follow-up ba asuntu sira, akordu sira ne'ebé trata no asina iha Indonézia atu haree pasu ba oin ne'e nusa.
Maibé pozisaun Governu haree katak bainhira asina ona ne'e pasu administrativu no tékniku tenke la'o antes atu implementa akordu hirak ne'e, no la'ós dehan asina ohin halo kedas.
Tanba to'o oras ne'e Timor-Leste mós iha akordu barak, no uluk sei asume kargu Prezidente Repúblika mós iha akrodu besik atus-rua-resin no husi totál akordu ida-ne'e ruanolu de'it mak implementa.
Nune'e, ezije ba Ministériu Negósiu Estranjeiru no Kooperasaun (MNEK), atu haree akordu hira, konvensaun hira no MoU hira mak dadaun ne'e iha tanba uluk to'o agora iha Akordu barak maibé implementasaun ki'ik liu no kuaze 10% husi akordu ne'ebé iha.
Dadaun ne’e mós Governu atentu loos, bainhira atu asina akordu ida-ne'e tenke prepara planu ba oin ne'e nusa, atubele implementa akordu ida-ne'e, maibé parte Governu sei halo esforsu atu Timor-Leste la'ós asina de'it maibé tenke implementa.
“Tanba balun tenke haruka ba Parlamentu Nasionál ratifika, balun sei halo follow-up no Governu iha konsensus saida mak tenke halo atu nune'e akordu sira ne'ebé iha ona asinatura bele implementa”, afirma nia.
Iha audénsia refere parte Xefe Governu mós informa ba Xefe Estadu kona-ba akordu ne'ebé Timor-Leste ho MCC, aprova husi Konsellu Ministru aprova ona no haruka ba Parlamentu Nasionál atu ratifika nomós investimentu sira ne'ebé Governu halo tantu iha Dili nomós iha munisípiu balun kona-ba oinsá mak hadi'a bee sira. (*)
