“Sira la simu ho liafuan ida katak, imi la hamlaha ka?. Estadu ne’e mak fó hán ami loron ka kalan ka?. La’e ida. O kuandu sai mai ami lees o iha li'ur ne'e, keta halimar ho ami, ami kamat o monu rahun tiha, keta halimar ho ami”, dehan nia ho hirus ba jornalista www.tempotimor.com iha Palásiu Prezidente, Bairo Pite, sesta (29/07).

Komunidade sira ne’e lamenta tanba dokumentu kuaze rihun-neen (6.000) ne’ebé mak hatama iha Palásiu Prezidente seidauk fahe billete ba komunidade sira ne'e.

“Sira mak fahe de’it billete oituan de’it ba komunidade sira ami sira ne'e la hetan tanba ne’e mak ami sei hein iha ne’e to'o hetan resposta”, deklara nia.

Nune’e Komunidade hirak ne'e kontinua forma iha Palásiu Prezidente to'o oras meiudia bainhira Prezidente Repúblika Horta fila ba uma mak komunidade sira taka iha dalan.

Maibé seidauk to'o oras 12:00 otl, funsionáriu Prezidénsia Repúblika ida sai hodi apela ba komunidade sira katak, sei fahe billete ba komunidade hotu iha oras tuku rua loraik.

“Agora meudia ona ne’ebé imi labele forma tan iha loron manas maibé imi fila ba uma orsida loraik mak mai fali hodi simu billete hirak ne’e”, dehan nia.

Nune’e lori funsionáriu hotu iha palásiu Prezidensia Repúblika hodi husu deskulpa ba funisionáriu ida ne’ebé hasai liafuan laiha etika ba komunidade sira ne’e. (*)