“Ha’u-nia hanoin tempu to’o ona atu hatudu duni Timor-Leste nia onestidade kona-ba rekonsiliasaun”, dehan Horta hafoin vizita Kortezia ba Armajen SAMES, I.P, iha Kampu Alor, segunda (01/08).
Maibé kona-ba preokupasaun timoroan hirak ne’ebé sira-nia naran tama iha lista krime sériu ida-ne'e presiza haree oinsá mak taka prosesu ne’ebé loké iha tinan 2000, iha tempu Nasaun Unida nian to’o agora loké nafatin.
Dadauk Sosiedade Sivíl kritika vizita Prezidente Repúblika ba Indonézia tanba hasoru malu ho lidér timoroan pro-autonomia iha Jakarta no Kupaun hanesan Eurico Guterres, Francisco Xavier Lopes da Cruz, Basílio Dias de Araújo no Joanico Belo. Tanba haree ba sira-nia kontribuisaun di’ak loos ba rai ida-ne’e durante tinan-20 ona, Timor-Leste moris hakmatek.
“Sira iha Kupaun, Atambua-Indonézia tinan 20-resin ona sira la halo problema ida ba rai ida-ne’e, la’ós sira mak kria problema iha bairru sira iha Dili ne’e no Grupu Arte Marsiál sira. Nune’e tempu to’o ona sé mak hakarak fila bele fila, ne’e individuál ona ho konsiénsia”, hatete nia. (*)
