Deputada CNRT, Maria Fernanda Lai hatete, nia parte sente lamenta oituan liga ba servisu MNEK tanba Komisaun C nia vizita ba Portugal, servisu migrasaun tahan tékniku na'in-rua iha nasaun Olanda.

“Liga ho MNEK ha'u lamenta tebtebes iha Komisaun C nia vizita ba Portugal, ami to'o iha Amstedam (Olanda), ema lahatene Pasaporte ne'e nia rai iha fali Globu, ha’u hakfodak, pela primeira-ves. Deputadu sira liu tiha ona ho pasaporte diplomatiku e tékniku rua tahan hela iha Mígrasaun, ne'e problema ne'e iha ne'ebé’, deklara Deputada Fernanda Lai iha iha plenaria PN, tersa (02/08).

Ba situasaun ida-ne'e, CNRT sente lamenta tanba dadaun Sekretáriu Estadu Asuntu Traballadór sira no sidadaun iha rai-liur mós iha ona maibé lahatene sira funsiona ka la'e, no sira hatene sira-nia papél ka la'e.

Tanba ne'e, CNRT husu resposta ba ida-ne'e, labele tau membru Governu barak la funsiona, depois gasta osan estadu hodi selu saláriu ho nia gabinete.

Vise Xefe Bankada CNRT, Patrocínio Fernandes dos Reis mós lamenta MNEK no Embaixadór Timor-Leste ne’ebé dezvaloriza dignidade orgaun estadu iha nasaun estranjeiru.

“Embaisadór tau bandeira RDTL atu reprezenta estadu, nia mak atu defende dignidade estadu ne'e perante iha nasaun sira seluk ninian oin, la'ós nia mak atu ba desvaloriza fali orgaun estadu sira iha ema-nia nasaun, ne'ebé embaisadór sira hanesan ne'e presiza sama atensaun”, dehan nia.

Tanba ne'e hanoin Membru Governu no Embaisadór sira hanesan ne'e presiza tuir formasaun ruma atu hatene saída mak estadu tanba dala-ruma sira hatene asume de'it kargu maibe la kompriende saída mak estadu.

“Ha'u hanoin karik sira presiza fali formasaun oituan atu intende saída mak estadu, saída mak orgaun ba estadu nian ne'e para bele hatene, talves sira la kompriende, ne'ebe sei atu sai embaisadór, atu sai Ministru ka Minastra Negósiu Estranjeiru di'ak liu fó formasaun ba sira atu hatene ita-nia estadu ne'e oinsá, orgaun soberanu iha ita-nia país ne'e oinsá, atu sira kompriende”, deklara nia. (*)