Ministru Prezidénsia Konsellu Ministru, Fidelis Leite Magalhães hatete, relatóriu ne’e avalia objetivu PED nian ne’ebé alkansa ona durante períodu tinan 2017 to’o tinan 2020. Baze ba avaliasaun nian maka Relatóriu kona-ba Implementasaun PED ne’ebé konklui ona iha tinan 2017, ne’ebé abranje períodu tinan 2011-2016.
Relatóriu ne’e kompila ona tuir kestionáriu sira ne’ebé prienxe liuhusi ajénsia Organizasaun Nasoins Unidas (ONU) ne’ebé fó apoiu ba Governu Timor-Leste iha atividade reforma nian, nune’e mós, relatóriu governamentál no relatóriu sira ne’ebé prodús ona husi Institutu Nasionál Estatístika.
Iha tinan 2020 nia rohan, husi totál meta hamutuk 200 husi faze 1 (tinan 2015) no faze 2 (tinan 2020), meta 53 (26%) mak implementa ona no meta 46 (23%) besik remata ona; meta 89 (45%) rejista ona progresu balun iha implementasaun; meta 8 (4%) seidauk hahú, no ba meta 4 (2%) laiha dadus disponivel atu hatene ninia implementasaun.
Iha aumentu ne’ebé moderadu iha númeru meta sira ne’ebé finaliza ona (husi 40 ba 53) no meta sira mak besik remata (husi 27 ba 46) durante períodu tinan 2017-2020.
Ba nível kapitál sosiál, iha tinan 2020 nia rohan, husi totál meta hamutuk 60 husi faze 1 (tinan 2015) no husi faze 2 (tinan 2020), meta 17 (28%) totalmente implementa ona no meta 14 (23%) besik hotu ona, meta 26 (44%) mak rejista progresu balun iha implementasaun, meta 3 (5%) seidauk hahú.
Nune’e iha tinan 2017-2020, meta 2 mak finaliza ona, 4 alkansa ona progresu boot ida no meta 1 rejista ona progresu balun.
Iha setór infraestrutura sira, iha tinan 2020 nia rohan, husi totál meta hamutuk 45 husi faze 1 (tinan 2015) no faze 2 nian iha (tinan 2020), meta 12 (27%) totalmente implementa ona no meta 7 (15%) besik remata ona; meta 21 (47%) rejista progresu balun iha implementasaun nian; meta 3 (7%) seidauk hahú, no ba meta 2 (4%) la iha dadus disponivel atu hatene ninia implementasaun. Iha períodu tinan 2017-2020, meta 7 maka remata ona, meta 3 alkansa ona progresu boot ida, no meta 1 rejista progresu balun.
Ba dezenvolvimentu ekonómiku, iha tinan 2020 nia rohan, husi totál meta hamutuk 52 husi faze 1 (tinan 2015) no faze 2 (tinan 2020) meta 16 (31%) totalmente implementa ona no meta 11 (21%) besik remata ona; meta 22 (24%) rejista progresu balun iha implementasaun; meta 1 (2%) seidauk hahú, no ba meta 2 (4%) laiha dadus disponivel atu hatene ninia implementasaun. Iha períodu tinan 2017-2020, finaliza ona meta 3 no meta 6 alkansa ona progresu boot ida no meta 1 rejista ona progresu balun.
Ba setór enkuadramentu institusionál, iha tinan 2020 ikus ne’e, husi totál meta hamutuk 43 husi faze 1 nian (tinan 2015) no faze 2 husi (tinan 2020), meta 8 (19%) totalmente implementa ona no meta 14 (33%) besik hotu ona; meta 20 (46%) iha progresu balun iha implementasaun; meta 1 (2%) seidauk hahú.
Ba períodu tinan 2017-2020, atinje ona meta 1, meta 6 alkansa ona progresu boot ida, no meta 1 rejista ona progresu balun. (*)