“Sim, ohin ne'e ha'u mai informa dezenvolvimentu iha RAEOA ne'e ba ita-nia Primeiru Ministru (PM), nune'e ita-nia Xefe Governu ne'e mós bele hatene progresu servisu sira iha RAEOA ne'ebá”, dehan Arsenio, iha Rezidénsia ofisiál PM, segunda (12/09).

Iha ne’e relata mós kona-ba ezekusaun orsamentu RAEOA nian ne’ebé atinje ona 33,8% (millaun $30), ezekusaun ne’e la inkui ho projetu sira ne’ebé daudaun iha progresu hanesan konstrusaun estrada sira.

Nune'e mós informa ba Primeiru Ministru relasiona ho RAEOA halo hela preparasaun ba pilotu hodi lori aviaun ZEESM, tanba ne’e mak daudaun ema na’in-ida estuda hela iha Kanada, bainhira sira fila, tinan 2023 bele lori rasik ona aviaun.

“Ha'u mós informa ba PM katak, ita hahú halo ona preparativu ba Timoroan sira atu lori rasik ita-nia aviaun ZEESM, tanba ne'e ita haruka ona Timoroan feto ida ba ona Kanada, no ita prepara tan ona Timoroan mane ida hodi tuir ba tan, bainhira sira remata sira bele mai lori rasik ona ita-nia aviaun ZEESM ne'e”, informa nia.

Nune'e mós simu orientasaun hosi Primeiru Ministru kona-ba investimentu saida mak RAEOA bele halo atu hetan osan rasik.

“Entaun ha’u mós hato’o katak foin lalais ami asina tiha ona akordu ho Timor GAP atu estabelese estasaun kombustível iha RAEOA”, esplika nia.

Entretantu Aviaun ZEESM hatama ona reseita hosi fulan-janeiru to’o agostu hamutuk $300.000 resin.

Ho orsamentu ne’ebé RAEOA iha, iha retormu ein termu sosiál no ekonómiku, bele haree rasik ezemplu konstrui no reabilita eskola besik 20 ne’e retornu sosiál.

“Aleinde ne’e loke estrada rurál, projetu perfurasaun bee-moos hodi distribui ba komunidade, ne’ebé ha’u hanoin osan ne’ebé tau ba RAEOA ami uza duni ba dezenvolvimentu”, hatete nian. (*)