“Bemvindu ba ita-bo'ot (partisipante) hotu sira-nia prezensa, mai iha fatin ida-ne'e ita ohin iha atividade importante ida atu haree de'it rezultadu peskiza ne'ebé mak DNDI hala'o. ha'u ofisialmente loke atividade ba dader ida-ne'e”, dehan Ministru Asuntu Parlamentar no Komunikasaun Sosiál (MAPKOMS), Francisco Martins da Costa Pereira Jerónimo, hafoin hala'o abertura ba semináriu nasionál iha salaun Delta Nova, kinta (10/11).
Husi peskiza ne'ebé DNDI hala'o ne'e sei la haree ba kauza, maibé haree mak sidadaun hira mak asesu informasaun husi mídia iha Timor-Leste.
“Seidauk haree ba tanba saida razaun saida, e halo nusa mak Governu bele foti medidas ida-ne'e seidauk to'o iha ne'ebá, maibé ho informasaun sira ne'e bele ajuda ita hotu no ajuda Governu atu haree filafali ba futuru saida mak ita atu halo ba sasán sira ne'e atubele asesu ba informasaun ne'e tuir politika estadu no Governu nian”, afirma nia.
Iha sekuénsia ba atividade semináriu ne'e mak halo aprezentasaun kona-ba públiku nia asesu ba meiu komunikasaun sosiál ne'ebé hala’o bazeia ba planu asaun anuál tinan 2021 no 2022 husi Diresaun Nasionál Desiminiasaun no Informasaun (DNDI) nian, iha ne'ebé prevee ona iha programa (Garantir à Liberdade de Expressão e Acesso à Informação) ho nia Sub-programa (Disseminação de informação sobre ação governativa e do programa de desenvolvimento no atividade Pesquisa Index Público Acesso aos Meios de Comunicação Social).
Peskiza ida-ne’e hala’o desde iha fulan-maiu tinan 2021 no remata iha fulan-agostu tinan 2022, no husi Prosesu peskiza ne'e mak rekolla dadus hala’o ho durasaun tinan ida no hala’o iha munisípiu 13 no RAEOA, iha postu 27 no suku 101.
Objetivu husi peskiza ida-ne’e nuudar meiu ida atu buka hatene públiku nia utilizasaun ba meiu komunikasaun sira no públiku nia asesu ba informasaun kona-ba programa Governu daualu nian.
Nune’e mós husi peskiza ne’e atu kria baze dadus nasionál ba opiniaun públiku nia asesu informasaun iha meiu komunikasaun, hodi propoin polítika ne’ebé adekuadu no inovativu ba necessidade.
Aleinde ne’e, iha trajetu peskiza ne’e ba populasaun hotu iha territóriu laran tomak ho idade hahú husi tinan 15 ba leten, nune'e peskiza ne'ebé DPAM hala’o durante ne'e, kordena mos ho Autoridade lokál sira hanesan, prezidente autoridade munisípiu, administradór postu, xefe suku sira no enumeradór sira hetan mós apoiu husi jestór rádiu komunidade sira, liliu jestór rádiu Iliwai Manatuto, jestór rádiu Povu Vikeké no jesór rádiu Komunidade Mauloko-Maubisse.
Purtantu, Konvidadu sira ne’ebé partisipa iha semináriu refere kuaze ema-na’in atus-tolu (300) kompostu husi membru Governu, membru Parlamentu Nasionál, autoridade lokál, organizasaun naun-governamentál, instituisaun mídia sira, ajénsia nasionál no internasionál sira, nomós reprezentante estudante universitáriu sira. (*)
