Nune’e, Ministru Asuntu Parlamentar no Komunikasaun Sosiál, (MAPKOMS), Francisco Martins da Costa Pereira Jerónimo hato'o parabens ba formandu sira, tanba konsege halo jestaun ba sira-nia tempu hodi tuir treinamentu to'o konklui.

"Ha'u hakarak atu fo parabens ba formandu sira hotu ne'ebé konklui ona nivel formasaun iha CEFTEC, ha'u hatene katak, ita-boot sira-nia tempu hodi ba tuir formasaun, atu bele mos transforma ita-nia sosiedade ida-ne'e husi saida mak agora dadauk ita hasoru", dehan nia iha ambitu fahe sertifikadu CEFTEC iha Delta Nova, kinta (24/11).

Nia dehan, agora tempu ona hakarak haree rezultadu, tanba ema hotu la'o dalan dok ona, presiza hetan informasaun sira no adpata ho situasaun real ne'ebe ohin loron mundu adapta.

Tanba ne’e, agradese mós ba formador sira, ne'ebe sakrifika aan fo formasaun hodi forma ajente hamutuk 300-resin, nune'e ohin konsege remata no fo sertifikadu ba sira.

"Agradese ba ita-boot sira-nia sakrifisiu, ha'u hanoin dalaruma iha lamentasoens, tanba dalaruma ba to'o iha fatin sira ne'ebe loloos la presiza ba mais tenke ba, eh tenke halo servisu sira-ne'e", nia hatete.

Tanba, planu anual ba tinan 2022 ne'ebe MAPKOMS iha kona-ba halo inspensaun ba iha nivel munisípiu, loloos halo de'it ba munisípiu hat, maibé ho esforsu tomak husi ekipa konsege kobre ba munisipiu lima inklui RAEOA.

"La'os munisípiu hat de'it, maibé to'o lima ho REAOA, ne'e ha'u hanoin esforsu ida makas eh presiza iha duni boa vontade ho boa responsabilidade atu hala'o kna'ar sira hanesan ne'e, tanba dalaruma ita tau kestaun, sé ba hat nusa mak ita ba fali neen, entaun atu aumenta tan rua ne'e presiza esforsu no sakrifisiu hodi halo", nia afirma.

Dalaruma iha atividade ne'e, balun ko'alia kona-ba kestaun seluk, maibé MAPKOMS aseita nune'e bele halo jestaun no saida mak ema hotu hakarak, tenke halo.

Husu ba formandu sira atu labele to'o de'it iha ne'e, maibé presiza estuda nafatin hodi kadi kakutak oinsá labele failla iha responsabilidade ba esperensia ne'ebe sira hetan husi CEFTEC.

Fatin hanesan, reprezentante formandu, Doni Domingos Martins agradese mós ba MAPKOMS no estrutura tomak husi CEFTEC ne'ebe konsege fo oportunidade ba sira hodi aprende no hasa'e koiñesimentu ho abilidade di'ak.

"Hato'o ami nia agradesimentu ba ita-boot sira, liliu Ministru MAPKOMS ho nia estrutura CEFTEC, tanba husi ita-boot sira, ohin loron ami hotu bele mai hamrik iha fatin ida-ne'e, hodi kapasita ami nia koiñesimentu no abilidade ne'ebe di'ak liuhusi formasaun hirak ne'ebe iha", dehan nia.

Tuir dadus ne'ebe koordenador CEFTEC, Rafael da Silva Freitas fo sai iha ninia diskursu, katak, atividade formasaun ne'ebe hala'o iha tinan 2022 ne'e, konsege produs ona formandu iha nivel nasional no munisipál hamutuk 323, maibé na'in-200-resin de'it mak ohin konsege marka prezensa iha serimonia atribuisaun sertifikadu.

Husi total formandu hirak ne'e, mai husi liña ministeriál, seitor públiku no seitor privadu, inklui jornlista sira. (*)