Ministru, Francisco Martins, hatete, governu mai hato'o programa ne'ebé sai prioridade bá VIII governu konstitusionál atu haree liu ba povu nia moris, tanba ema mak sai sentru ba dezenvolvimentu no hato'o mós prioridade ne'ebé MAPKOMS nian, liberdade espresaun, liberdade imprensa no liberdade boa governasaun, katak ema hotu iha liberdade atu hato'o saida mak nia hakarak, saida mak nia senti.
Nune’e, ministru Francisco Martins promete sei hari'i sentru informasaun no sei ajuda fo kapasitasaun ba joven sira atu dezenvolve sentru ne'e.
Xefe suku Uaigae, Marcos Soares agradese no fó apresiasaun ba Ministru Asuntus parlamentár no komunikasaun Sosiál, tanba bele lori programa mai to'o iha suku.
Prezidente autoridade Baucau, Olivio Freitas Boulesa haksolok tebes ho programa ne'e, tanba bele fahe informasaun ba povu no hein katak programa sei kontinua nafatin.
Alende ne’e, komunidade sira mós hato'o preokupasaun no difikuldade transporte, saúde hare liu ba rekursu humanu, edukasaun, programa sesta bázika, estrada, eletrisidade ne'ebé mate lakan, ajuda ekipamemtus desportu no bee mós.
Dialogu kona-ba programa ''Naroman ba Suku'' ne’e, prezenza husi reprezentante Ministériu Administrasaun Estatal, reprezentante Ministeriu Saúde, Administradór Postu Vemase, Komandante PNTL Munisípiu Baucau, reprezentante Veteranus, kargu xefia MAPKOMS nian no komunidade Suku Uaigae. (*)